ലണ്ടന്‍: യൂറോപ്പിലെ കുപ്രസിദ്ധ മനുഷ്യക്കടത്ത് മാഫിയത്തലവനായ ബര്‍സാന്‍ മജീദ് അറസ്റ്റിലായി. രണ്ടുവര്‍ഷമായി ഒളിവിലായിരുന്ന ഇയാളെ ഇറാഖിലെ കുര്‍ദിസ്ഥാന്‍ മേഖലയില്‍നിന്നാണ് അറസ്റ്റ് ചെയ്തത്. ബര്‍സാന്‍ മജീദ് ഇറാഖിലെ സുലൈമാനിയ നഗരത്തിലുണ്ടെന്ന് അടുത്തിടെ കണ്ടെത്തിയിരുന്നു. ഇതിനുപിന്നാലെയാണ് ബര്‍സാന്‍ മജീദ് അറസ്റ്റിലായത്. ബ്രിട്ടനിലെ നാഷണല്‍ ക്രൈം ഏജന്‍സി(എന്‍സിഎ) അറസ്റ്റ് വാര്‍ത്ത സ്ഥിരീകരിച്ചു.
‘ദി സ്‌കോര്‍പിയന്‍’ എന്ന പേരിലാണ് ബര്‍സാന്‍ അറിയപ്പെട്ടിരുന്നത്. പതിനായിരത്തോളം കുടിയേറ്റക്കാരെയാണ് ബര്‍സാനും സംഘവും ഇതുവരെ യൂറോപ്യന്‍ രാജ്യങ്ങളിലേക്ക് അനധികൃതമായി എത്തിച്ചത്. ഇംഗ്ലീഷ് ചാനല്‍ വഴി ബോട്ടുകളിലാണ് ഇയാള്‍ ആളുകളെ കൊണ്ടുവന്നിരുന്നത്. നേരത്തെ നോട്ടിങ്ഹാമില്‍ താമസിച്ചിരുന്ന ബര്‍സാനെതിരെ ബെല്‍ജിയത്തിലും കേസുണ്ട്. പിടികൂടാന്‍ കഴിഞ്ഞില്ലെങ്കിലും ബെല്‍ജിയത്തിലെ കേസില്‍ ഇയാളെ കോടതി ശിക്ഷിച്ചിരുന്നു.
2016 മുതല്‍ 2021 വരെയുള്ള കാലയളവില്‍ ബ്രിട്ടന്‍ ഉള്‍പ്പെടെയുള്ള രാജ്യങ്ങളിലേക്ക് നടന്ന മനുഷ്യക്കടത്തിനെ നിയന്ത്രിച്ചിരുന്നത് ബര്‍സാന്‍ മജീദും സംഘവുമാണെന്നാണ് അന്വേഷണത്തിലെ കണ്ടെത്തല്‍.
ഇയാളുടെ സംഘത്തില്‍ ഉള്‍പ്പെട്ട 26 പേര്‍ വിവിധ രാജ്യങ്ങളിലായി നേരത്തെ അറസ്റ്റിലായിരുന്നു. ബ്രിട്ടന്‍, ഫ്രാന്‍സ്, ബെല്‍ജിയം എന്നിവിടങ്ങളിലായി ഇവരിപ്പോള്‍ ജയില്‍ ശിക്ഷ അനുഭവിക്കുകയാണ്. എന്നാല്‍ ബര്‍സാന്‍ മജീദ് അന്വേഷണ ഏജന്‍സികളെ കബളിപ്പിച്ച് ഒളിവില്‍ താമസിക്കുകയായിരുന്നു.
അടുത്തിടെ മജീദുമായി നടത്തിയ ഫോണ്‍ സംഭാഷണം ബിബിസി പുറത്തുവിട്ടിരുന്നു. കുര്‍ദിഷ് സുരക്ഷാ ഏജന്‍സിയാണ് ബര്‍സാന്‍ മജീദിനെ അറസ്റ്റ് ചെയ്തതെന്നാണ് റിപ്പോര്‍ട്ട്. ചോദ്യംചെയ്യല്‍ ഉള്‍പ്പെടെയുള്ള നടപടികള്‍ക്കായി യൂറോപ്യന്‍ പോലീസുമായി ബന്ധപ്പെടുമെന്നും കുര്‍ദിസ്ഥാന്‍ അധികൃതര്‍ വിശദീകരിച്ചു.
പ്രതികരിക്കാൻ ഇവിടെ എഴുതുക: