കോട്ടയം: ചൂടത്തുനിന്ന് വന്നശേഷം തണുത്ത വെള്ളം കുടിച്ചാല് കഴുത്തിലെ ഞരമ്പ് പൊട്ടുമെന്നും ഇത്തരത്തില് വഴിയില് കുഴഞ്ഞുവീണ് സ്കൂള് വിദ്യാര്ത്ഥികളടക്കം ഒട്ടേറെ പേരെ ഗുരുതരാവസ്ഥയില് ആശുപത്രിയില് എത്തിച്ചിട്ടുണ്ടെന്നുള്ള തരത്തില് വാട്സാപ്പിലും മറ്റും പ്രചരിക്കുന്ന സ്ത്രീശബ്ദത്തിലുള്ള മെസ്സേജ് മെഡിക്കല് കോളേജിന്റെ അറിവോടെയല്ലെന്ന് അധികൃതര് വ്യക്തമാക്കി.
ഇത്തരത്തില് ആരെയും മെഡിക്കല് കോളേജില് അഡ്മിറ്റ് ചെയ്തിട്ടില്ല. ഇത് സംബന്ധിച്ച് മെഡിക്കല് കോളേജ് അധികൃതര് അനൗണ്സ്മെന്റ് നടത്തിയെന്നു പറയുന്നതും ശരിയല്ല. ഈ വോയിസ് ക്ലിപ്പ് ആളുകളില് വലിയ ഭയാശങ്ക ഉണ്ടാക്കിയ സാഹചര്യത്തിലാണ് മെഡിക്കല് കോളേജിന്റെ വിശദീകരണം. കോട്ടയം മെഡിക്കല് കോളേജിന്റെ പേരില് ഇത്തരം വ്യാജ സന്ദേശം നല്കിയതിനെതിരെ പോലീസില് പരാതി നല്കുമെന്നും അധികൃതര് വ്യക്തമാക്കി.
കോട്ടയം മെഡിക്കല് കോളേജിന്റെ തൊട്ടടുത്ത് താമസിക്കുന്ന സ്ത്രീയെന്ന് പരിചയപ്പെടുത്തിയാണ് മെസേജ് തുടങ്ങുന്നത്. വളരെ സീരിയസ് ആയ കാര്യമാണെന്നും കഴിയുന്നത്ര ഷെയര് ചെയ്യണമെന്നും സ്ത്രീ ആവശ്യപ്പെടുന്നുണ്ട്. ഇതു കേട്ട് ജനപ്രതിനിധികള് അടക്കമുള്ളവര് തങ്ങളുടെ ഗ്രൂപ്പുകളില് ഇത് വ്യാപകമായി ഷെയര് ചെയ്തു കൊണ്ടിരിക്കുകയാണ്.
പ്രതികരിക്കാൻ ഇവിടെ എഴുതുക: