കോട്ടയം: യൂടൂബില്‍ പ്രചരിക്കുന്ന ഒരു ഗായികയുടെ വീഡിയോ തന്റെ മകളുടേതല്ലെന്ന് പ്രശസ്ത ഗായകനും യേശുദാസിന്റെ മകനുമായ വിജയ് യേശുദാസ്. ‘തന്റെ മകളുടേതെന്ന പേരിലാണ് ഈ വീഡിയോ അപ്‌ലോഡ് ചെയ്തിരിക്കുന്നത്. നന്നായി പാടുന്ന ഒരു കുട്ടിയുടേതാണ് ആ വീഡിയോ. ആ കുട്ടിക്ക് കിട്ടേണ്ട പ്രശസ്തിയാണ് എന്റെ മകള്‍ക്ക് കിട്ടുന്നതെ’ന്നും അമൃത ടി.വിയിലെ ആനീസ് കിച്ചന്‍ എന്ന പരിപാടിയില്‍ വിജയ് യേശുദാസ് പറഞ്ഞു.
‘തന്റെ മകള്‍ പാട്ടുപാടുമെങ്കിലും പൊതുവേദിയില്‍ കാര്യമായി പ്രത്യക്ഷപ്പെട്ടിട്ടില്ല. വീഡിയോയും ചെയ്തിട്ടില്ല’ അദ്ദേഹം വ്യക്തമാക്കി.
ഹരിവരാസനം വിശ്വമോഹനം എന്ന കീര്‍ത്തനമാണ് യൂ ടൂബില്‍ പെണ്‍കുട്ടി പാടുന്നത്. 25000 ലൈക്കും 22 ലക്ഷം വ്യൂവേഴ്‌സും നേടിയ ഈ വീഡിയോ ‘യേശുദാസിന്റെ പേരക്കുട്ടി വിജയ് യേശുദാസിന്റെ മകള്‍ അമേയുടേതായി പ്രചരിക്കുന്ന ശ്രീ ലളിതാ ഹരിവരാസനം ‘എന്ന പേരിലാണ് ആരോ യൂട്യൂബില്‍ അപ്‌ലോഡ് ചെയ്തിരിക്കുന്നത്.
യേശുദാസിനും കൊച്ചുമകള്‍ക്കും ആശംസകള്‍ നേര്‍ന്നുകൊണ്ട് സത്യമറിയാതെ ഒട്ടേറെ പേര് കമന്റ് ബോക്‌സില്‍ പ്രതികരിച്ചിട്ടുണ്ട്. എന്നാല്‍ ശ്രീലളിത എന്ന ഗായികയുടേതാണ് ഈ വീഡിയോ. ശ്രീലളിതയുടെ ഒട്ടേറെ കീര്‍ത്തനങ്ങള്‍ യൂടൂബില്‍ ലഭ്യമാണ്. ഇക്കാര്യം കമന്റ് ബോക്‌സില്‍ ഒട്ടേറെ പേര് ചൂണ്ടിക്കാട്ടിയിട്ടുമുണ്ട്.
പ്രതികരിക്കാൻ ഇവിടെ എഴുതുക: