കൽപ്പറ്റ: മാനന്തവാടിയിൽ ബിജെപി പ്രചാരണ ബോർഡുകൾ എടുത്തുമാറ്റി പോലീസ്. ബിജെപി തമിഴ്‌നാട് അധ്യക്ഷനും കോയമ്പത്തൂരിലെ ബിജെപി സ്ഥാനാര്‍ത്ഥിയുമായ കെ.അണ്ണാമലൈയെ സ്വാഗതം ചെയ്തുകൊണ്ട് മാനന്തവാടിയിൽ ബിജെപി സ്ഥാപിച്ച പ്രചാരണ ബോര്‍ഡുകളാണ് പോലീസ് എടുത്തു മാറ്റിയത്.
സംഭവത്തെ തുടർന്ന് ബിജെപിയുടെ മണ്ഡലം സ്ഥാനാർഥിയും സംസ്ഥാന അധ്യക്ഷനുമായ കെ. സുരേന്ദ്രനും പോലീസും തമ്മിൽ തർക്കമുണ്ടായി. പിന്നീട് ബിജെപി പ്രവര്‍ത്തകര്‍ ബോര്‍ഡുകൾ തിരികെ സ്ഥാപിച്ചു. തുടർന്ന് ബോർഡുകൾ മാറ്റണമെന്ന് ആവശ്യപ്പെട്ട് എൽ ഡി എഫ് – യു ഡി എഫ് പ്രവർത്തകർ പ്രതിഷേധവുമായി രംഗത്തെത്തി. തെരഞ്ഞെടുപ്പ് ഉദ്യോഗസ്ഥരുടെ വാഹനം ഇവർ തടഞ്ഞു. പിന്നാലെ എഡി എം സ്ഥലത്തെത്തി ബോർഡുകൾ നീക്കം ചെയ്തു.
പെരുമാറ്റ ചട്ടത്തിന് വിരുദ്ധമായി ബോർഡുകൾ സ്ഥാപിച്ചന്ന് പരാതിയിലാണ് നടപടി. തെരഞ്ഞെടുപ്പ് പ്രചാരണത്തിന്റെ ഭാഗമായി അണ്ണാമലൈയുടെ റോഡ് ഷോയും ഇന്ന് മാനന്തവാടിയിൽ നടക്കുന്നുണ്ട്. ഇന്നലെ രാത്രിയാണ് ബിജെപി പ്രവർത്തകർ നഗരത്തിൽ ബോർഡുകൾ സ്ഥാപിച്ചത്. ബോർഡുകൾ സ്ഥാപിച്ച സ്ഥലങ്ങളെ ചൊല്ലിയാണ് തർക്കമുണ്ടായത്.
പ്രതികരിക്കാൻ ഇവിടെ എഴുതുക: