തൃശ്ശൂര്‍: മാസപ്പടി കേസില്‍ മകള്‍ വീണക്കെതിരെ ഇ ഡി നടപടിക്ക് സാധ്യതയുണ്ടല്ലോയെന്ന ചോദ്യത്തിന് ക്ഷുഭിതനായി പ്രതികരിച്ച് മുഖ്യമന്ത്രി. നിങ്ങള്‍ക്ക് അങ്ങനെയൊരു തോന്നലുണ്ടെങ്കില്‍ അതുമായി നടന്നോളൂ എന്നായിരുന്നു മുഖ്യമന്ത്രിയുടെ പ്രതികരണം.
ഇന്നലെ രാവിലെയാണ് സിപിഎം ജില്ലാക്കമ്മിറ്റി ഓഫീസില്‍ പിണറായി വിജയന്‍ മാധ്യമങ്ങളെ കണ്ടത്. കടമെടുപ്പ് സംബന്ധിച്ച കേസില്‍ സുപ്രീംകോടതിയില്‍ സംസ്ഥാനത്തിന് തോല്‍വിയുണ്ടായിട്ടില്ലെന്നും മുഖ്യമന്ത്രി അവകാശപ്പെട്ടു.
കടമെടുക്കാന്‍ അനുമതി ലഭിച്ചില്ലെങ്കിലും കേസ് ഭരണഘടനാ ബഞ്ചിന് വിട്ടത് നേട്ടമെന്നായിരുന്നു മുഖ്യമന്ത്രിയുടെ അവകാശവാദം. കരുവന്നൂര്‍ തട്ടിപ്പില്‍ പ്രതികള്‍ക്കെതിരെ നടപടി സ്വീകരിച്ചിട്ടുണ്ടെന്നും മുഖ്യമന്ത്രി അവകാശപ്പെട്ടു. എന്നാല്‍ നിക്ഷേപകര്‍ക്ക് പണം എന്ന് മടക്കി നല്കാനാകുമെന്ന് വ്യക്തമായി പറയാന്‍ പിണറായി തയ്യാറായില്ല.
പ്രധാനമന്ത്രി കഴിഞ്ഞദിവസം കരുവന്നൂരിലെ ഇരകള്‍ക്ക് പണം മടക്കി നല്കാന്‍ നടപടിയുണ്ടാകുമെന്ന് പറഞ്ഞ സാഹചര്യത്തില്‍ മുഖ്യമന്ത്രിയുടെ ഭാഗത്ത് നിന്നും ഇക്കാര്യത്തില്‍ വ്യക്തമായ മറുപടി പ്രതീക്ഷിച്ചവര്‍ നിരാശരായി.
കരുവന്നൂരില്‍ പ്രതികള്‍ക്കെതിരെ നടപടി സ്വീകരിച്ചുവെന്ന മുഖ്യമന്ത്രിയുടെ അവകാശവാദവും തെറ്റാണ്. ഇപ്പോള്‍ പ്രതികളാക്കപ്പെട്ട 54 പേരില്‍ ഭൂരിഭാഗവും ഇ ഡി കണ്ടെത്തിയ പ്രതികളാണ് എന്നതാണ് വസ്തുത.
പ്രതികരിക്കാൻ ഇവിടെ എഴുതുക: