ന്യൂദല്ഹി: പാരിസ് ഒളിംപിക്സിന് മുന്നോടിയായി ലൗലിന ബോര്ഗോഹെയ്നും നിഖാത് സരിനും അടക്കമുള്ള ഭാരതത്തിന്റെ വനിതാ ബോക്സിങ് താരങ്ങള് പരിശീലനത്തിനായി വിദേശത്തേക്ക്. പ്രത്യേക പരിശീലനത്തിനായി തുര്ക്കിയിലേക്കാണ് താരങ്ങളും പരിശീലകരും പുറപ്പെടുക.
രണ്ട് തവണ ലോക ചാമ്പ്യന്ഷിപ്പില് സ്വര്ണം സ്വന്തമാക്കിയ നിഖാത് സരിന്, ടോക്കിയോ ഒളിംപിക്സ് വെങ്കല മെഡല് ജേത്രി ലൗലിന ബോര്ഗോഹെയ്ന്, ഏഷ്യന് ഗെയിംസ് വെങ്കല മെഡല് ജേത്രി പര്വീന് ഹൂഡ, പ്രീതി പവാര് എന്നിവര്ക്കാണ് തുര്ക്കിയിലേക്ക് പുറപ്പെടാന് അംഗീകാരം ലഭിച്ചിരിക്കുന്നത്. ഒളിംപിക്സ് മെഡല് ലക്ഷ്യമിട്ട് പ്രവര്ത്തിക്കുന്ന മിഷന് ഒളിംപിക്സ് സെല്(എംഒസി) ആണ് അനുമതി നല്കിയിരിക്കുന്നത്. ഒളിംപിക്സ് മെഡല് ലക്ഷ്യമിട്ട് കേന്ദ്ര യുവജനകാര്യ, കായിക മന്ത്രാലയത്തിന് കീഴിലാണ് എംഒസിയുടെ പ്രവര്ത്തനം. വിദേശ പരിശീലനത്തിന് അംഗീകാരം ലഭിക്കാന് താരങ്ങള് എംഒസിക്ക് നിര്ദേശം മുന്നോട്ടുവച്ചിരുന്നു. ഇതിന്റെ അടിസ്ഥാനത്തിലാണ് നടപടി. ബോക്സര്മാര്ക്കൊപ്പം രണ്ട് പരിശീലകര്ക്കും ഫിസിയോതെറാപ്പിസ്റ്റുകള്ക്കും തുര്ക്കിയിലേക്ക് പുറപ്പെടാം. ഹൈപെര്ഫോമന്സ് ഡയറക്ടറായി ബെര്ണാര്ഡ് ദ്യൂണെ വന്നതിനെ തുടര്ന്നാണ് വിദേശ പരിശീലനം ആവശ്യമാണെന്ന് വ്യക്തമായത്.
ബോക്സര്മാര്ക്ക് പുറമെ ഏതാനും ഗുസ്തി താരങ്ങള്ക്ക് കൂടി വിദേശത്ത് പോയി പരിശീലനം തേടാന് എംഒസി അംഗീകാരം നല്കിയിട്ടുണ്ട്. ടാര്ജെറ്റ് ഒളിംപിക് പോഡിയം സ്കീ(ടിഓപിഎസ്)മിന്റെ ഭാഗമായാണ് താരങ്ങള്ക്ക് പരിശീലനത്തിന് എംഒസി അംഗീകാരം നല്കിയത്. ഒളിംപിക്സന് മുന്നേ ഈ മാസം ബിഷ്കെക്കില് നടക്കുന്ന ഏഷ്യന് ചാമ്പ്യന്ഷിപ്പ് കൂടി മുന്നില് കണ്ടാണ് ഗുസ്തി താരങ്ങള് വിദേശ പരിശീലനത്തിന് തയ്യാറെടുക്കുന്നത്. സുജീത്, ദീപക് പൂനിയ, നവീന്, എന്നിവര് പരിശീലനത്തിനായി റഷ്യയിലേക്കാണ് പുറപ്പെടുന്നത്. ഈ മാസം 19-21വരെ ആണ് ഏഷ്യന് ഒളിംപിക് യോഗ്യതാ ടൂര്ണമെന്റ്.
ബക്കുവില് നടക്കുന്ന ഐഎസ്എസ്ഓഫ് ലോകകപ്പിന് മുന്നോടിയായി ഷൂട്ടിങ് താരം ഭൗനീഷ് മെന്ഡിറാറ്റയ്ക്ക് ഇറ്റലിയിലേക്ക് പരിശീലനത്തിന് പുറപ്പെടാനും അംഗീകാരം നല്കിയിട്ടുണ്ട്. പരിശീലകന് ഡാനിയേലി ഡി സ്പിഗ്നോയും താരത്തിനൊപ്പമുണ്ടാകും.
കോമണ്വെല്ത്ത് മെഡല് ജേതാവായ മലയാളി ലോങ്ജംപ് താരം മുരളി ശ്രീശങ്കറിന്റെ നിര്ദേശത്തിനും എംഒസി അംഗീകാരം നല്കി. സുഷോയിലും ദോഹയിലും നടക്കുന്ന ഡയമണ്ട് ലീഗില് പങ്കെടുക്കാന് സാമ്പത്തിക പിന്തുണ നല്കണമെന്നായിരുന്നു ശ്രീശങ്കറിന്റെ നിര്ദേശം.
വനിതാ ടേബിള് ടെന്നിസ് താരം മണിക ബദ്രയ്ക്കും പിന്തുണ നല്കിയിട്ടുണ്ട്. ക്രൊയേഷ്യയില് നടക്കുന്ന ഡബ്ല്യുടിടി ഫീഡര് വറാസ്ദിനില് പങ്കെടുക്കാനും ഷീസിയയില് നടക്കുന്ന മിക്സച് ഡബിള്സ് ഒളിംപിക് യോഗ്യതയില് പങ്കെടുക്കാനും സാമ്പത്തിക സഹായമാണ് മണിക ബത്രയ്ക്ക് അനുവദിച്ചത്.
പ്രതികരിക്കാൻ ഇവിടെ എഴുതുക: