തിരുവനന്തപുരം:പൂക്കോട് വെറ്ററിനറി സര്‍വകലാശാല വിദ്യാര്‍ത്ഥി സിദ്ധാര്‍ത്ഥന്റെ മരണത്തില്‍ സിബിഐ അന്വേഷണം പ്രഖ്യാപിച്ച് ദിവസങ്ങള്‍ കഴിഞ്ഞിട്ടും സിബിഐക്ക് കേസ് സംബന്ധിക്കുന്ന രേഖകള്‍ കൈമാറാതിരുന്ന സംഭവത്തില്‍ നടപടിയുമായി സര്‍ക്കാര്‍.ആഭ്യന്തര വകുപ്പിലെ എം സെക്ഷനിലെ ഡെപ്യൂട്ടി സെക്രട്ടറി ഉള്‍പ്പെടെ മൂന്ന് ഉദ്യോഗസ്ഥരെ സസ്‌പെന്‍ഡ് ചെയ്തു.
രേഖകള്‍ കൈമാറാന്‍ വൈകിയ സംഭവത്തില്‍ മുഖ്യമന്ത്രി പിണറായി വിജയന്‍ റിപ്പോര്‍ട്ട് തേടിയതിന് പിന്നാലെയാണ് നടപടി.ആഭ്യന്തര വകുപ്പിലെ എം സെക്ഷനിലെ ഡെപ്യൂട്ടി സെക്രട്ടറി പ്രശാന്ത്, സെക്ഷന്‍ ഓഫീസര്‍ ബിന്ദു, ഓഫീസ് അസിസ്റ്റന്റ് അഞ്ജു എന്നിവരെയാണ് സസ്‌പെന്‍ഡ് ചെയ്തത്. ആഭ്യന്തര വകുപ്പിലെ ഈ സെക്ഷനിലുള്ളവരാണ് രേഖകള്‍ കൈമാറേണ്ടത്.
സിദ്ധാര്‍ത്ഥന്റെ മരണത്തില്‍ സിബിഐ അന്വേഷണത്തിനുള്ള വിജ്ഞാപനം ഈ മാസം 9 തീയതിയാണ് സര്‍ക്കാര്‍ ഇറക്കിയെങ്കിലും കേസിന്റെ മറ്റ് വിശദാംശങ്ങള്‍ അടങ്ങിയ റിപ്പോര്‍ട്ട് നല്‍കിയിരുന്നില്ല. ഇതിന് ഉത്തരവാദി ആരെന്ന് കണ്ടെത്തണമെന്ന് ആഭ്യന്തര സെക്രട്ടറിക്ക് മുഖ്യമന്ത്രി നിര്‍ദേശം നല്‍കിയതിനെ തുടര്‍ന്നാണ് ഉദ്യോഗസ്ഥര്‍ക്കെതിരെ നടപടിയുണ്ടായത്. ഒമ്പതിന് കൈമാറേണ്ട രേഖകള്‍ 16ാം തീയതിയാണ് കൈമാറിയത്. രേഖകള്‍ കൈമാറാന്‍ വൈകിയ കാര്യം താഴെതട്ടിലുള്ള ഉദ്യോഗസ്ഥര്‍ സര്‍ക്കാരിനെ അറിയിച്ചിരുന്നില്ലെന്നാണ് അധികൃതരുടെ വിശദീകരണം.
എന്നാല്‍, സിബിഐ അന്വേഷണം അട്ടിമറിക്കാന്‍ ശ്രമം നടക്കുന്നുണ്ടെന്നും പ്രതികളെ സംരക്ഷിക്കാന്‍ നീക്കം നടക്കുന്നുവെന്നും സിദ്ധാര്‍ത്ഥന്റെ കുടുംബവും പ്രതിപക്ഷവും ആവര്‍ത്തിച്ചതില്‍ സര്‍ക്കാര്‍ വീണ്ടും സമ്മര്‍ദ്ദത്തിലായി. രേഖകള്‍ കൈമാറിയത് വൈകിയതില്‍ മുഖ്യമന്ത്രി വിശദീകരണം തേടി.
സിബിഐ അന്വേഷണം ഒരു കേസില്‍ പ്രഖ്യാപിച്ചുകഴിഞ്ഞാല്‍ അതിന്റെ വിജ്ഞാപനം കേന്ദ്രത്തിന് കൈമാറുന്നതിനൊപ്പം തന്നെ എഫ്‌ഐആര്‍ പരിഭാഷപ്പെടുത്തിയത് ഉള്‍പ്പെടെ രേഖകളെല്ലാം കൈമാറും. എന്നാല്‍, സിദ്ധാര്‍ത്ഥന്റെ കേസില്‍ വിജ്ഞാപനം മാത്രമാണ് കൈമാറിയത്. സിബിഐക്ക് കേസ് ഏറ്റെടുക്കണമോ വേണ്ടയോ എന്നു തീരുമാനിക്കാന്‍ സാധിക്കാതിരിക്കുന്ന സാഹചര്യമാണ് ഉണ്ടായത്. ദിവസങ്ങള്‍ വൈകി പ്രോഫോമ റിപ്പോര്‍ട്ട് ഇ-മെയിലായിട്ടാണ് കേന്ദ്ര സര്‍ക്കാരിനും സിബിഐ ഡയറക്ടര്‍ക്കും കൈമാറിയത്.
കേസ് അട്ടിമറിക്കപ്പെടുന്നെന്നും ഇടപെടണമെന്നും അഭ്യര്‍ത്ഥിച്ച് സിദ്ധാര്‍ത്ഥന്റെ പിതാവ് കഴിഞ്ഞ ദിവസം ഗവര്‍ണര്‍ ആരിഫ് മൊഹമ്മദ് ഖാനെ സന്ദര്‍ശിച്ചിരുന്നു. കേന്ദ്ര സഹമന്ത്രിയും തിരുവനന്തപുരത്തെ ലോകസഭാ മണ്ഡലം സ്ഥാനാര്‍ത്ഥിയുമായ രാജീവ് ചന്ദ്രശേഖറിനെയും അദ്ദേഹം സന്ദര്‍ശിച്ചു.
ഗവര്‍ണര്‍ ഉടന്‍ തന്നെ പ്രശ്‌നത്തില്‍ ഇടപെട്ട് സിദ്ദാര്‍ത്ഥനെ മര്‍ദ്ദിച്ചെന്ന് ആരോപണവിധേയരായ വിദ്യാര്‍ത്ഥികളുടെ സസ്പന്‍ഷന്‍ റദ്ദാക്കിയ താത്കാലിക വി സി ഡോ പി സി ശശീന്ദ്രനോട് വിശദീകരണം ചോദിച്ചു.വിദ്യാര്‍ത്ഥികളുടെ സസ്പന്‍ഷന്‍ റദ്ദാക്കിയ നടപടി റദ്ദാക്കിയതോടെ വി സി രാജിവയ്‌ക്കാനും നിര്‍ബന്ധിതനായി.
പ്രതികരിക്കാൻ ഇവിടെ എഴുതുക: