കൊച്ചി: കാലിക്കറ്റ് വിസി സ്ഥാനത്ത് നിന്ന് ഡോ.എം കെ ജയരാജിനെ പുറത്താക്കിയ ചാന്‍സലറുടെ നടപടി സ്റ്റേ ചെയ്തു ഹൈക്കോടതി. അതേസമയം, കാലടി വിസിയെ സ്ഥാനത്ത് നിന്നും ഡോ എംവി നാരായണനെ പുറത്താക്കിയ ചാന്‍സലറുടെ നടപടിയില്‍ ഹൈക്കോടതി ഇടപെട്ടില്ല.
യുജിസി യോഗ്യത ഇല്ലാത്തത്തിനാലാണ് കാലിക്കറ്റ്, സംസ്‌കൃത സര്‍വകലാശാലകളിലെ വൈസ് ചാന്‍സലര്‍മാരെ ഗവര്‍ണര്‍ ആരിഫ് മുഹമ്മദ് ഖാന്‍ പുറത്താക്കിയത്. സാങ്കേതിക സര്‍വകലാശാല വിസിയായിരുന്ന ഡോ. രാജശ്രീയെ യുജിസി യോഗ്യതയില്ലാത്തതിന്റെ പേരില്‍ സുപ്രീംകോടതി പുറത്താക്കിയിരുന്നു. ഈ വിധി അടിസ്ഥാനമാക്കി 11 വിസിമാരെയും പുറത്താക്കാന്‍ ഗവര്‍ണര്‍ നടപടി തുടങ്ങിയിരുന്നു.
കോടതി പുറത്താക്കിയതും കാലാവധി കഴിഞ്ഞവര്‍ക്കും ശേഷം ബാക്കിയുണ്ടായ നാല് പേരില്‍ രണ്ട് പേരെയാണ് ഈ മാസം ഏഴിന് ഗവര്‍ണര്‍ പുറത്താക്കിയത്. സെര്‍ച്ച് കമ്മിറ്റിയില്‍ സര്‍ക്കാര്‍ പ്രതിനിധിയായി ചീഫ് സെക്രട്ടറി ഉണ്ടായിരുന്നു എന്നതിനാലാണ് കാലിക്കറ്റ് വിസി ഡോ. എം കെ ജയരാജിനെ ഗവര്‍ണര്‍ പുറത്താക്കാന്‍ കാരണം. ഒറ്റപ്പേര് മാത്രം നിര്‍ദ്ദേശിച്ചതാണ് സംസ്‌കൃത വി സി ഡോ എംവി നാരായണനെ കുരുക്കായത്.
പ്രതികരിക്കാൻ ഇവിടെ എഴുതുക: