തിരുവനന്തപുരം: ചേങ്കോട്ടുകോണം ശ്രീരാമദാസ ആശ്രമത്തില്‍ നിന്ന് കൊല്ലൂര്‍ മൂകാംബിക ക്ഷേത്രത്തിലേക്ക് ശ്രീരാമരഥം യാത്ര തിരിച്ചു. ലോകം ഒരു കുടുംബം എന്ന സന്ദേശം വിളംബരം ചെയ്തു കൊണ്ട് ചേങ്കോട്ടുകോണം ശ്രീരാമദാസ ആശ്രമത്തിന്റെ ആഭിമുഖ്യത്തില്‍ ശ്രീരാമദാസമിഷന്‍ യൂണിവേഴ്‌സല്‍ സൊസൈറ്റിയാണ് ശ്രീരാമനവമി രഥയാത്ര നടത്തിവരുന്നത്.
ആശ്രമത്തില്‍ നടന്ന പ്രഭാത പൂജകള്‍ക്ക് ശേഷം മഠാധിപതി സ്വാമി ബ്രഹ്മപാദാനന്ദ സരസ്വതി തൃപ്പാദങ്ങള്‍ ശ്രീരാമരഥത്തില്‍ വിഗ്രഹപ്രതിഷ്ഠ നടത്തി. ജ്യോതി ക്ഷേത്രത്തില്‍ ആരതി പൂജകള്‍ക്ക് പിന്നാലെ രഥത്തെ അനുഗമിക്കുന്നവര്‍ വ്രതാനുഷ്ഠാനത്തോടെ മാല ധരിച്ചതിന് ശേഷമാണ് യാത്രയ്‌ക്കുള്ള തുടക്കം കുറിച്ചത്.
രാവിലെ ഒമ്പതരയോടെ പഴവങ്ങാടി ശ്രീമഹാഗണപതി ക്ഷേത്രത്തിലെ മേല്‍ശാന്തി ശങ്കരന്‍ നമ്പൂതിരിയുടെ മുഖ്യകാര്‍മികത്വത്തില്‍ ആരതി ഉഴിഞ്ഞാണ് ശ്രീരാമരഥത്തെ യാത്രയാക്കിയത്. മാര്‍ച്ച് 22ന് കൊല്ലൂര്‍ ശ്രീ മൂകാംബിക ക്ഷേത്ര സന്നിധിയില്‍ നിന്നും സ്വാമി ബ്രഹ്മപാദാനന്ദ സരസ്വതി ഭദ്രദീപ പ്രതിഷ്ഠ നടത്തുന്നതോടെ പ്രയാണം ആരംഭിക്കും.
കേരളത്തിലും കര്‍ണാടക, തമിഴ്‌നാട് സംസ്ഥാനങ്ങളിലെ വിവിധ ജില്ലകളിലും പരിക്രമണം പൂര്‍ത്തിയാക്കി ശ്രീരാമനവമി ദിനമായ ഏപ്രില്‍ 17ന് ചേങ്കോട്ടുകോണം ശ്രീരാമദാസ ആശ്രമത്തില്‍ രഥയാത്ര പര്യവസാനിക്കും. ശ്രീരാമനവമി രഥയാത്ര കണ്‍വീനര്‍ സ്വാമി സത്യാനന്ദ തീര്‍ത്ഥപാദര്‍, എസ്.ആര്‍.ഡി.എം.യൂ.എസ് അധ്യക്ഷന്‍ എസ്. കിഷോര്‍ കുമാര്‍ എന്നിവരാണ് ശ്രീരാമരഥത്തെ നയിക്കുന്നത്.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: