ആലപ്പുഴ : ആത്മഹത്യ ചെയ്ത നെല്‍കര്‍ഷകന് അയച്ച ജപ്തി നോട്ടീസ് മരവിപ്പിച്ചു. പട്ടികജാതി പട്ടികവര്‍ഗ വികസന കോര്‍പ്പറേഷന്‍ നല്‍കിയ വായ്പ പരമാവധി ഇളവോടെ തീര്‍പ്പാക്കാന്‍ മന്ത്രി കെ രാധാകൃഷ്ണന്‍ നിര്‍ദ്ദേശം നല്‍കി.
കുടുംബത്തിന്റെ സാഹചര്യം മനസിലാക്കാതെ ഉദ്യോഗസ്ഥര്‍ നോട്ടീസ് അയച്ചതില്‍ മന്ത്രി റിപ്പോര്‍ട്ട് ആവശ്യപ്പെട്ടു. തകഴി കുന്നുമ്മയില്‍ ആത്മഹത്യ ചെയ്ത കര്‍ഷകനായ കെ.ജി പ്രസാദിന്റെ കുടുംബത്തിനാണ് കഴിഞ്ഞ ദിവസം നോട്ടീസ് ലഭിച്ചത്.പ്രസാദിന്റെ പേരിലുള്ള അഞ്ച് സെന്റ് സ്ഥലവും വീടും കണ്ടുകെട്ടുമെന്നാണ് നോട്ടീസിലുളളത്.
പാട്ടത്തിനെടുത്ത മൂന്നര ഏക്കറില്‍ വളമിടാന്‍ അരലക്ഷം രൂപ വായ്പ ലഭിക്കാത്ത സാഹചര്യത്തിലാണ് കഴിഞ്ഞ നവംബര്‍ 11ന് പ്രസാദ് കീടനാശിനി കഴിച്ച് ജീവനൊടുക്കിയത്. പ്രസാദ് മരിക്കും മുമ്പ് ഭാര്യ ഓമന തൊഴിലുറപ്പ് ജോലി ചെയ്തിരുന്നു. നിലവില്‍ ബന്ധുക്കളുടെയും സുഹൃത്തുക്കളുടെയും സഹായത്തിലാണ് കുടുംബം കഴിയുന്നത്. ഓമന പട്ടിക ജാതി പട്ടിക വര്‍ഗ വികസന കോര്‍പ്പറേഷനില്‍ നിന്ന് 2022 ആഗസ്റ്റില്‍ 60,000 രൂപ സ്വയം തൊഴില്‍ വായ്പ എടുത്തിരുന്നു.15,000 രൂപയോളം തിരിച്ചടച്ചെങ്കിലും 11 മാസമായി തിരിച്ചടവ് മുടങ്ങി. കുടിശികയായ 17,600 രൂപ അഞ്ചു ദിവസത്തിനുള്ളില്‍ അടച്ചില്ലെങ്കില്‍ വീടും പുരയിടവും ജപ്തി ചെയ്യുമെന്നാണ് നോട്ടീസിലുളളത്.
പ്രതികരിക്കാൻ ഇവിടെ എഴുതുക: