കൊച്ചി: മാധ്യമ പ്രവർത്തകയോട് അപമര്യാദയായി പെരുമാറിയെന്ന കേസിൽ സുരേഷ് ഗോപിക്ക് മുൻകൂർ ജാമ്യം. നിലവിൽ അറസ്റ്റിനുള്ള സാഹചര്യമില്ലെന്ന് സർക്കാർ കോടതി അറിയിച്ചു. സർക്കാർ നിലപാട് കൂടി കണക്കിലെടുത്താണ് തീരുമാനം. ചോദ്യം ചെയ്യലിന് പിന്നാലെ സ്ത്രീത്വത്തെ അപമാനിച്ചുവെന്ന വകുപ്പ് 354 കൂടി ചേർത്ത് എഫ് ഐആർ പരിഷ്കരിച്ചതോടെയാണ് സുരേഷ് ഗോപി ഹൈക്കോടതിയെ സമീപിച്ചത്.
കരുവന്നൂർ വിഷയത്തിൽ സർക്കാറിനെതിരെ ജാഥ നയിച്ചതിനോടുള്ള രാഷ്‌ട്രീയ വൈരാഗ്യമാണ് കേസിന് കാരണമെന്നാണ് മുൻകൂർ ജാമ്യാപേക്ഷയിൽ വ്യക്തമാക്കിയിരുന്നത്. ഒക്ടോബര്‍ 27ന് കോഴിക്കോട് വാര്‍ത്താസമ്മേളനം നടക്കുന്നതിനിടയിലാണ് സുരേഷ് ഗോപി തോളില്‍ കൈവെച്ചെന്ന ആരോപണം വനിതാ മാധ്യമപ്രവര്‍ത്തക ഉയര്‍ത്തിയത്. പരിപാടി കഴിഞ്ഞ് മടങ്ങുന്നതിനിടെ വഴി തടഞ്ഞ മാധ്യമ പ്രവർത്തകയെ മാറ്റുക മാത്രമാണ് ചെയ്തതെന്നും മോശമായി പെരുമാറിയിട്ടില്ലെന്നുമാണ് ഹർജിയിൽ പറയുന്നത്. കേസിൽ കോഴിക്കോട് നടക്കാവ് പോലീസ് കുറ്റപത്രം സമർപ്പിച്ചിരുന്നു.
സുരേഷ് ഗോപിയ്‌ക്ക് വളരെ നാളായി അറിയുന്ന ഒരു മാധ്യമപ്രവര്‍ത്തകയാണ് പരാതി നല്‍കിയത്. വീഡിയോയില്‍ തന്നെ വളരെ പ്രസന്നവതിയായി കാണപ്പെട്ടിരുന്ന മാധ്യമപ്രവര്‍ത്തക പിന്നീട് രാത്രിയോടെയാണ് സുരേഷ് ഗോപിയ്‌ക്കെതിരെ കേസ് നല്‍കിയത്. ഇതിന് പിന്നില്‍ ഗൂഢാലോചനയുണ്ടെന്ന് ആരോപണമുയര്‍ന്നിരുന്നു. വനിതാ മാധ്യമപ്രവര്‍ത്തക കോഴിക്കോട് നടക്കാവ് പൊലീസില്‍ കേസ് നല്‍കിയതോടെ ഇന്ത്യന്‍ ശിക്ഷാ നിയമം 354 എയിലെ രണ്ട് ഉപവകുപ്പനുസരിച്ച് സുരേഷ് ഗോപിയ്‌ക്കെതിരെ പൊലീസ് കേസെടുത്തു. നവമ്പര്‍ 18ന് സുരേഷ് ഗോപിയെ ചോദ്യം ചെയ്ത ശേഷം നടക്കാവ് പോലീസ് വിട്ടയച്ചിരുന്നു.
അതിന് ശേഷം, ഐപിസി 354ാം വകുപ്പ് പ്രകാരം സ്ത്രീത്വത്തെ അപമാനിച്ചു എന്ന കേസ് കൂടി ചേര്‍ത്തിരിക്കുകയാണ്. ഇതിനാല്‍ ഈ വകുപ്പുപയോഗിച്ച് തന്നെ അറസ്റ്റ് ചെയ്യുമെന്ന് ആശങ്കയുണ്ടെന്നും മകളുടെ വിവാഹം ജനവരി 17നാണെന്നും ചൂണ്ടിക്കാട്ടി സുരേഷ് ഗോപി ഹൈക്കോടതിയില്‍ മുന്‍കൂര്‍ ജാമ്യാപേക്ഷ നല്‍കുകയായിരുന്നു. മകളുടെ വിവാഹം ഗുരുവായൂരിലും തിരുവനന്തപുരത്തും ആയി നടത്താനാണ് തീരുമാനം. ഈ സാഹചര്യത്തില്‍ മുന്‍കൂര്‍ ജാമ്യം നല്‍കണമെന്നായിരുന്നു ആവശ്യം.
പ്രതികരിക്കാൻ ഇവിടെ എഴുതുക: