കൊല്ലത്ത് പോമറേനിയൻ നായയെ മോഷ്ടിച്ച സംഘം ദേഹമാസകലം മുറിവേൽപ്പിച്ച് ഉപേക്ഷിച്ചു; സിസിടിവി ദൃശ്യങ്ങൾ പുറത്ത്

കൊല്ലം: പുനലൂരിൽ വളർത്തു നായയെ വീട്ടിൽ നിന്നും മോഷ്ടിച്ച് കടത്തിക്കൊണ്ട് പോയി ശരീരം മുഴുവൻ മുറിവേൽപ്പിച്ച് റോഡിൽ ഉപേക്ഷിച്ചു. സംഭവത്തിന്റെ സിസിടിവി ദൃശ്യങ്ങളുൾപ്പെടെ പുറത്തു വന്നിട്ടുണ്ട്. എന്നാൽ പ്രതികളെ പിടികൂടാൻ ഇനിയും പോലീസിന് സാധിച്ചിട്ടില്ലെന്നാണ് വീട്ടുകാരുടെ പരാതി.

പുനലൂർ കക്കോട് സ്വദേശി ലക്ഷ്മിയുടെ വളർത്തു നായയെ പുതുവർഷത്തലേന്ന് രാത്രിയാണ് വീട്ടിൽ അതിക്രമിച്ച് കയറി കടത്തിക്കൊണ്ടു പോയത്. വീട്ടിൽ ഉണ്ടായിരുന്ന മൂന്നിൽ ഒരു നായയെ ആണ് മോഷ്ടിച്ചത്. വീടിന്റെ ഗേറ്റ് ചാടിക്കടന്ന് അകത്ത് കയറിയ യുവാവ് പോമറേനിയൻ ഇനത്തിൽ പെട്ട നായയുമായി കടന്നു കളയുന്നതിന്റെ ദൃശ്യം സിസിടിവിയിൽ പതിഞ്ഞിരുന്നു.

പുറത്ത് ബൈക്കിൽ കാത്ത് നിന്ന സംഘത്തെയും ദൃശ്യങ്ങളിൽ കാണാം. കഴിഞ്ഞ ദിവസം രാത്രി വീടിന് സമീപത്ത് നിന്ന് 500 മീറ്റർ അകലെ മുറിവേറ്റ നിലയിൽ വഴിയരികിൽ നായയെ കണ്ടെത്തുകയായിരുന്നു. എന്നാൽ പരാതി നൽകി മൂന്ന് ദിവസം കഴിഞ്ഞിട്ടും പ്രതിയെ പിടികൂടാനായില്ല. ശരീരമാസകലം പരിക്കേറ്റ നായയ്‌ക്ക് പുനലൂർ മൃഗാശുപത്രിയിൽ ചികിൽസ നൽകി.