ചെങ്ങന്നൂര്‍:രണ്ട് ശബരിമല തീര്‍ത്ഥാടകര്‍ പമ്പയാറ്റില്‍ മുങ്ങിമരിച്ചു. പമ്പയാറ്റിന്റെ ഭാഗമായ പാറക്കടവില്‍ കുളിക്കാനിറങ്ങിയപ്പോഴാണ് അപകടം.
തമിഴ്‌നാട് സ്വദേശികളാണ് മുങ്ങിമരിച്ചത്.സംഘമായി തമിഴ്‌നാട്ടില്‍ നിന്നെത്തിയതായിരുന്നു ഇവര്‍.വൈകിട്ട് 5.30നായിരുന്നു സംഭവം.
ചെന്നൈ ടി നഗര്‍ 70ല്‍ സന്തോഷ് (19), അവിനാശ് (21) എന്നിവരാണ് മരിച്ചത്. ശബരിമല ദര്‍ശനം കഴിഞ്ഞ് ചെങ്ങന്നൂരിലെത്തിയ സംഘം ചെന്നൈ മെയിലില്‍ നാട്ടിലേക്ക് പോകും മുമ്പ് കുളിക്കാനിറങ്ങിയപ്പോഴാണ് അപകടം സംഭവിച്ചത്.
അഗ്നിശമന സേനയും പൊലീസും നാട്ടുകാരും ചേര്‍ന്ന് തിരച്ചില്‍ നടത്തി രാത്രി ഏഴ് മണിയോടെയാണ് മൃതദേഹങ്ങള്‍ കണ്ടെത്തിയത്.കുളിക്കവെ ഒഴുക്കില്‍പെട്ട് സന്തോഷ് മുങ്ങിതാണപ്പോള്‍ രക്ഷപ്പെടുത്താന്‍ ശ്രമിച്ച അവിനാഷും അപകടത്തില്‍ പെടുകയായിരുന്നു.
ഞായറാഴ്ചയാണ് ഗുരുസ്വാമി രവിയുടെ നേതൃത്വത്തില്‍ 22 പേര്‍ ശബരിമല ദര്‍ശനത്തിനായി എത്തിയത്. സംഘത്തില്‍ മൂന്ന് സ്ത്രീകളും ഉണ്ട്.
പ്രതികരിക്കാൻ ഇവിടെ എഴുതുക: