ബെംഗളൂരു: എംബിബിഎസ് ബിരുദദാന ചടങ്ങിന് പിന്നാലെ പാമ്പുകടിയേറ്റ് മലയാളി യുവാവിന് ദാരുണാന്ത്യം. കര്‍ണാടകയിലെ തുമകുരുവിലുള്ള ശ്രീ സിദ്ധാര്‍ഥ മെഡിക്കല്‍ കോളജിലാണ് സംഭവം. തൃശ്ശൂര്‍ മണ്ണുത്തി നടത്തറ ആശിര്‍വാദില്‍ ബാലകൃഷ്ണന്‍-ലത ദമ്പതികളുടെ മകന്‍ അദിത് ബാലകൃഷ്ണനാണ് മരിച്ചത്.
കോളജിലെ ബിരുദദാന ചടങ്ങില്‍ പങ്കെടുത്ത് താമസസ്ഥലത്തേക്ക് മടങ്ങുന്നതിനിടെയാണ് സംഭവം. കാര്‍ പാര്‍ക്ക് ചെയ്തിരുന്ന സ്ഥലത്തുവച്ച് അദിതിന് പാമ്പുകടിയേറ്റിരുന്നു. എന്നാല്‍ പാമ്പ് കടിച്ചതാണെന്ന് മനസിലാക്കാതെ അദിത് ഹെഗ്രെ ഗുബ്ബി റോഡിലെ താമസസ്ഥലത്തേക്ക് പോയി. അദിതിന്റെ അമ്മയും മറ്റ് ബന്ധുക്കളും ഒപ്പമുണ്ടായിരുന്നു. താമസ സ്ഥലത്തെത്തിയശേഷം ബാത്ത് റൂമില്‍ കയറിയ അദിത് വാതില്‍ തുറക്കാത്തതിനെ തുടര്‍ന്ന് നടത്തിയ പരിശോധനയില്‍ അബോധാവസ്ഥയില്‍ കണ്ടെത്തി. ഉടന്‍ സമീപത്തെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
പോസ്റ്റുമോര്‍ട്ടം നടത്തിയതില്‍ നിന്നും രക്തത്തില്‍ ഉയര്‍ന്ന അളവില്‍ പാമ്പിന്‍ വിഷം കണ്ടെത്തുകയായിരുന്നു. പോസ്റ്റ്‌മോര്‍ട്ടം നടപടികള്‍ക്ക് ശേഷം മൃതദേഹം തൃശ്ശൂരിലേക്ക് കൊണ്ടുപോയി. അദിതിന്റെ അച്ഛന്‍ ഇറ്റലിയില്‍ നിന്ന് എത്തിയതിന് ശേഷമായിരിക്കും സംസ്‌കാരം. സംഭവത്തില്‍ തുമകുരു പോലീസ് കേസെടുത്ത് അന്വേഷണം ആരംഭിച്ചു.
പ്രതികരിക്കാൻ ഇവിടെ എഴുതുക: