കൊച്ചി: ഒരു പാര്‍ട്ടിയുടെ സ്ഥാനാര്‍ത്ഥിയായി ജയിച്ചശേഷം എതിര്‍പാര്‍ട്ടിയെ പിന്തുണയ്ക്കുന്നത് കൂറുമാറ്റമാണെന്ന് ഹൈക്കോടതി വ്യക്തമാക്കി. ആലപ്പുഴ വെളിയനാട് പഞ്ചായത്ത് പ്രസിഡന്റായിരുന്ന എം.പി സജീവിനെ കൂറുമാറ്റ നിരോധന നിയമപ്രകാരം അയോഗ്യനാക്കിയാണ് ജസ്റ്റിസ് ബെച്ചു കുര്യന്‍ തോമസ് ഇക്കാര്യം പറഞ്ഞത്.
വെളിയനാട് പഞ്ചായത്തിലെ ഒമ്പതാം വാര്‍ഡില്‍ നിന്ന് കോണ്‍ഗ്രസ് സ്ഥാനാര്‍ത്ഥിയായി ജയിച്ച സജീവ് പാര്‍ട്ടി വിപ്പ് ലംഘിച്ച് പ്രതിപക്ഷം കൊണ്ടുവന്ന അവിശ്വാസപ്രമേയത്തെ പിന്തുണച്ചതുമായി ബന്ധപ്പെട്ട ഹര്‍ജിയിലാണ് ഹൈക്കോടതിയുടെ തീരുമാനം. സജീവ് ആദ്യടേമില്‍ പഞ്ചായത്ത് പ്രസിഡന്റായിരുന്നു. പിന്നീട് പാര്‍ട്ടി നല്കിയ കാലാവധി കഴിഞ്ഞതോടെ കോണ്‍ഗ്രസിലെ തന്നെ സാബു ചാക്കോയെ പ്രസിഡന്റാക്കാന്‍ പദവിയില്‍ നിന്ന് മാറിക്കൊടുത്തു.
എന്നാല്‍ സാബു ചാക്കോയ്‌ക്കെതിരെ എല്‍ഡിഎഫ് അവിശ്വാസ പ്രമേയം കൊണ്ടുവന്നപ്പോള്‍ സജീവ് അതിനെ പിന്തുണച്ചു. അവിശ്വാസ പ്രമേയത്തില്‍ നിന്ന് വിട്ടു നില്‍ക്കാന്‍ അന്നത്തെ ആലപ്പുഴ ഡിസിസി പ്രസിഡന്റ് എം. ലിജു വിപ്പ് നല്കിയെങ്കിലും ഇതു ലംഘിച്ച് സജീവ് അവിശ്വാസ പ്രമേയത്തെ പിന്തുണയ്‌ക്കുകയായിരുന്നു. അവിശ്വാസം പാസായതിനെത്തുടര്‍ന്ന് സാബു ചാക്കോയ്‌ക്ക് സ്ഥാനം നഷ്ടമായി. തുടര്‍ന്ന് ഇടതു പിന്തുണയോടെ സജീവ് പഞ്ചായത്ത് പ്രസിഡന്റായി.
സജീവിനെ അയോഗ്യനാക്കാന്‍ എം. ലിജു തെരഞ്ഞെടുപ്പു കമ്മിഷനില്‍ പരാതി നല്കിയെങ്കിലും നിയമപ്രകാരമല്ല വിപ്പ് നല്കിയതെന്ന് ചൂണ്ടിക്കാട്ടി പരാതി തള്ളി. ഇതിനെതിരെയാണ് ലിജു ഹൈക്കോടതിയെ സമീപിച്ചത്. തന്നെ പാര്‍ട്ടിയാണ് പുറത്താക്കിയതെന്നായിരുന്നു സജീവിന്റെ വാദം. എന്നാല്‍ ഈ വാദം തള്ളിയ ഹൈക്കോടതി സജീവിനെ അയോഗ്യനാക്കി. സജീവിന്റെ പ്രവൃത്തി അയോഗ്യത ക്ഷണിച്ചു വരുത്തുന്നതാണെന്നും ഹൈക്കോടതി പറഞ്ഞു.
പ്രതികരിക്കാൻ ഇവിടെ എഴുതുക: