തിരുവനന്തപുരം: വ്യാജ ഐഡി കാര്‍ഡ് നിര്‍മിച്ച് യൂത്ത് കോണ്‍ഗ്രസ് തെരഞ്ഞെടുപ്പില്‍ പങ്കാളിയായതിലൂടെ രാജ്യ ദ്രോഹപ്രവര്‍ത്തനമാണ് നടത്തിയിരിക്കുന്നതെന്ന് ബിജെപി സംസ്ഥാന സെക്രട്ടറി അഡ്വ.പി.സുധീര്‍ വാര്‍ത്താ സമ്മേളനത്തില്‍ പറഞ്ഞു.
സംഭവത്തില്‍ യൂത്ത്‌കോണ്‍ഗ്രസ് പ്രസിഡന്റ് രാഹുല്‍ രാഹുല്‍ മാങ്കൂട്ടത്തെയും ഷാഫി പറമ്പില്‍ എംഎല്‍എയേയും അറസ്റ്റ് ചെയ്യണമെന്നും സുധീര്‍ ആവശ്യപ്പെട്ടു.
സൂക്ഷമമായ പരിശോധന നടക്കാത്തയിടങ്ങളിലെല്ലാം ആര്‍ക്കു വേണമെങ്കിലും ഈ വ്യാജ ഐഡി കാര്‍ഡുകള്‍ ഇനിയും ഉപയോഗിക്കാന്‍ കഴിയും. ഇത് രാജ്യസുരക്ഷയ്‌ക്കും ആഭ്യന്തര സുരക്ഷയ്‌ക്കും വലിയ ഭീഷണിയാണ്. യൂത്ത് കോണ്‍ഗ്രസ് നേതൃത്വം നടത്തിയത് സംഘടന പിടിച്ചെടുക്കാനുള്ള പ്രവര്‍ത്തനം മാത്രമല്ല രാജ്യസുരക്ഷയ്‌ക്ക് ഭീഷണിയാകുന്ന രാജ്യദ്രോഹപ്രവര്‍ത്തനം കൂടിയാണ്. കോണ്‍ഗ്രസിന്റെ ദേശീയ, സംസ്ഥാന നേതൃത്വങ്ങളുടെ അറിവോടെയാണ് വ്യാജ ഐഡി കാര്‍ഡ് നിര്‍മിച്ചത്. ഇതിന് നേതൃത്വം കൊടുത്തവരെല്ലാം നിയമത്തിനു മുന്നില്‍ കൊണ്ട് വരണം.
അടൂരില്‍ നിന്നും അറസ്റ്റിലായ നാല് യൂത്ത് കോണ്‍ഗ്രസ് പ്രവര്‍ത്തകരും രാഹുല്‍ മാങ്കൂട്ടത്തിലുമായും ഷാഫി പറമ്പിലുമായും അടുത്ത ബന്ധമുള്ളവരാണ്. വ്യാജ ഐഡി കാര്‍ഡ് നിര്‍മാണത്തിന് നേതൃത്വം കൊടുത്ത യൂത്ത് കോണ്‍ഗ്രസ് സംസ്ഥാന സെക്രട്ടറി റിനോയെ ചോദ്യം ചെയ്യാന്‍ പോലീസ് തയ്യാറായിട്ടില്ലെന്ന് സുധീര്‍ ആരോപിച്ചു.
തിരുവനന്തപുരത്ത് ഒരു ഡിസിസി ഭാരവാഹിയുടെ നേതൃത്വത്തിലാണ് വ്യാജ ഐഡി കാര്‍ഡ് നിര്‍മിച്ചത്. കൊല്ലത്ത് അയ്യായിരം വ്യാജ ഐഡി കാര്‍ഡുകള്‍ നിര്‍മിച്ചു. കാര്‍ഡുകള്‍ നിര്‍മിച്ചവര്‍ പരസ്യമായി മാധ്യമങ്ങളിലൂടെ പറഞ്ഞിട്ടും യാതൊരു അന്വേഷണവും നടക്കുന്നില്ല. എല്‍ഡിഎഫ് യുഡിഎഫ് അവിശുദ്ധ കൂട്ടുകെട്ടാണ് ഇതിനു പിന്നില്‍. 2024ലെ ലോക്‌സഭാ തെരെഞ്ഞെടുപ്പിനെ അട്ടിമറിക്കാനുള്ള പരിശീലനമാണ് യൂത്ത് കോണ്‍ഗ്രസ് നടത്തുന്നതെന്നും സുധീര്‍ പറഞ്ഞു.
പ്രതികരിക്കാൻ ഇവിടെ എഴുതുക: