പെരുമ്പാവൂര്‍: അനധികൃതമായി മണ്ണിട്ട് നികത്തിയ സ്ഥലത്ത് സിനിമാ സെറ്റ് നിര്‍മിക്കുന്നതിന് നഗരസഭയുടെ സ്റ്റോപ്പ് മെമ്മോ. പൃഥ്വിരാജ് നായകനായ ‘ഗുരുവായൂര്‍ അമ്പല നടയില്‍’ എന്ന സിനിമയുടെ സെറ്റ് നിര്‍മാണമാണ് നഗരസഭ തടഞ്ഞിരിക്കുന്നത്. വെട്ടിക്കനാക്കുടി വി.സി.ജോയിയുടെ മകന്‍ ജേക്കബ് ജോയിയുടെ ഉടമസ്ഥതയിലുള്ള കാരാട്ടുപള്ളിക്കരയിലുള്ള സ്ഥലത്താണ് സിനിമയ്‌ക്കായി ഗുരുവായൂര്‍ അമ്പലത്തിന്റെ മാതൃക നിര്‍മിച്ചിരുന്നത്. എന്നാല്‍ ഇവിടെ പാടം മണ്ണിട്ടു നികത്തുന്നുവെന്ന പരാതിയുടെ അടിസ്ഥാനത്തില്‍ നഗരസഭാ അധികൃതര്‍ പരിശോധനയ്‌ക്ക് എത്തിയ ശേഷം സ്റ്റോപ്പ് മെമ്മോ നല്‍കുകയായിരുന്നു.
വിപിന്‍ ദാസാണ് ഗുരുവായൂര്‍ അമ്പല നടയില്‍ എന്ന സിനിമയുടെ സംവിധായകന്‍. ഒരു മാസത്തോളമായി അറുപതോളം കലാകാരന്മാര്‍ ചേര്‍ന്ന് ഇവിടെ നിര്‍മാണം നടത്തി വരികയാണ്. പാടം നികത്തിയ സ്ഥലത്ത് നിര്‍മാണ അനുമതി നല്‍കാന്‍ കഴിയില്ല. അനുമതിയില്ലാതെയാണ് നിര്‍മാണ പ്രവര്‍ത്തനങ്ങള്‍ നടന്നു വരുന്നതെന്നും നഗരസഭാധ്യക്ഷന്‍ ബിജു ജോണ്‍ ജേക്കബ് പറഞ്ഞു.
എന്നാല്‍ നിര്‍മാണത്തിന് അനുമതിക്കായി അപേക്ഷ നല്‍കിയിട്ടുണ്ടെന്നും കൗണ്‍സില്‍ യോഗത്തില്‍ പരിഗണിക്കാമെന്നാണ് അറിയിച്ചിരിക്കുന്നതെന്നുമാണ് സിനിമയുടെ അണിയറ പ്രവര്‍ത്തകര്‍ പ്രതികരിച്ചത്. ചില കൗണ്‍സിലര്‍മാരുടെ വ്യക്തി താല്‍പര്യമാണ് നിര്‍മാണത്തിനു സ്റ്റോപ്പ് മെമ്മോ നല്‍കാന്‍ കാരണമെന്ന് വി.സി.ജോയ് ആരോപിച്ചു. മകന്റെ പേരിലുള്ള സ്ഥലത്തെ നിര്‍മാണത്തിന് തന്റെ പേരിലാണ് സ്റ്റോപ്പ് മെമ്മോ നല്‍കിയതെന്നും അദ്ദേഹം ആരോപിച്ചു.
പ്രതികരിക്കാൻ ഇവിടെ എഴുതുക: