തിരുവനന്തപുരം: മുസ്ലിം ലീഗുമായി ബന്ധപ്പെട്ട് നടത്തിയ പരാമര്‍ശം വിവാദമായതിനെ തുടര്‍ന്ന് വിശദീകരണവുമായി കെപിസിസി അധ്യക്ഷന്‍ കെ സുധാകരന്‍. തന്റെ പ്രസ്താവന ലീഗിന് എതിരാണെന്ന് വളച്ചൊടിക്കുകയായിരുന്നുവെന്ന് സുധാകരന്‍ പറഞ്ഞു. ഇപ്പോഴത്തെ വിവാദം സിപിഎമ്മിനെ വെളളപൂശാന്‍ വേണ്ടിയാണ്.
കോണ്‍ഗ്രസും ലീഗും തമ്മില്‍ സുദൃഢമായ ബന്ധമാണുളളതെന്ന് വ്യക്തമാക്കിയ സുധാകരന്‍ വളച്ചൊടിച്ച വാര്‍ത്ത നല്‍കി അത് തകര്‍ക്കാമെന്ന് കരുതേണ്ടെന്നും പറഞ്ഞു. തന്റെ രാഷ്‌ട്രീയം എന്താണെന്ന് കൃത്യമായ ബോധ്യം ലീഗ് നേതൃത്വത്തിനുണ്ടെന്നും സുധാകരന്‍ പറഞ്ഞു.
സിപിഎമ്മിന്റെ പാലസ്തീന്‍ ഐക്യദാര്‍ഢ്യ റാലിയിലേക്ക് ക്ഷണിച്ചാല്‍ മുസ്ലിം ലീഗ് പങ്കെടുക്കുമെന്ന് ഇ ടി മുഹമ്മദ് ബഷീര്‍ എം പി പറഞ്ഞതിന് പിന്നാലെ കെ സുധാകരന്‍ നടത്തിയ പരാമര്‍ശമാണ് വിവാദത്തിലായത്. വരുന്ന ജന്മം പട്ടിയാകുന്നതിന് ഇപ്പോഴേ കുരയ്‌ക്കാന്‍ പറ്റുമോ എന്നായിരുന്നു സുധാകരന്‍ പറഞ്ഞത്.
തുടര്‍ന്ന് ഉന്നത സ്ഥാനത്തിരിക്കുന്നവര്‍ ഉത്തരവാദിത്തത്തോടെ പ്രതികരിക്കണമെന്ന് മുസ്ലീം ലീഗ് ജനറല്‍ സെക്രട്ടറി പി എം എ സലാം പറഞ്ഞു. സുധാകരന്റെ പരാമശത്തിന് മറുപടിയില്ലെന്നായിരുന്നു ഇ ടി മുഹമ്മദ് ബഷീര്‍ പ്രതികരിച്ചത്.
പ്രതികരിക്കാൻ ഇവിടെ എഴുതുക: