കോട്ടയം: ജന്മഭൂമി ചീഫ് എഡിറ്ററായിരുന്ന ലീലാ മേനോന്‍ പത്രപ്രവര്‍ത്തന രംഗത്ത് സ്ത്രീകള്‍ക്ക് ഉത്തമ മാതൃകയാണെന്ന് മുന്‍ എംപി ഡോ. സെബാസ്റ്റ്യന്‍ പോള്‍. കോട്ടയം ജില്ലാ പഞ്ചായത്ത് ഹാളില്‍ സംഘടിപ്പിച്ച വനിതാ കമ്മിഷന്‍ പബ്ലിക് ഹിയറിങ്ങില്‍ മുഖ്യപ്രഭാഷണം നടത്തുകയായിരുന്നു അദ്ദേഹം.
കേരളത്തിലെ വനിതാ മാധ്യമപ്രവര്‍ത്തകരെ കുറിച്ച് പഠിപ്പിക്കുമ്പോള്‍ എന്നും പരാമര്‍ശിക്കപ്പെടുന്ന പേരാണ് ലീലാ മേനോന്റേത്. ഇന്ത്യന്‍ എക്‌സ്പ്രസിലേക്ക് ജേര്‍ണലിസ്റ്റ് ആയി അവര്‍ എത്തുന്നത് പോസ്റ്റല്‍ ഡിപ്പാര്‍ട്ട്‌മെന്റിലെ ജോലി ഉപേക്ഷിച്ചാണ്. ജേര്‍ണലിസത്തോടുള്ള അഭിനിവേശമാണ് അവരെ മാധ്യമരംഗത്തെത്തിച്ചത്.
കോട്ടയത്ത് ലേഖികയായിരുന്നപ്പോള്‍ നിരവധി ബൈലൈന്‍ സ്റ്റോറികള്‍ ലീലാ മേനോന്റേതായി പുറത്തുവന്നു. അന്വേഷണാത്മക പത്രപ്രവര്‍ത്തനത്തിന്റെ തുടക്കക്കാരിയായിരുന്നു അവര്‍, അദ്ദേഹം പറഞ്ഞു. വനിതാ കമ്മിഷന്‍ അധ്യക്ഷ അഡ്വ. പി. സതീദേവി അധ്യക്ഷയായി. പരിപാടിയില്‍ മാധ്യമരംഗത്ത് സ്ത്രീകള്‍ നേരിടുന്ന പ്രശ്‌നങ്ങളെക്കുറിച്ച് ചര്‍ച്ച ചെയ്തു.
പ്രതികരിക്കാൻ ഇവിടെ എഴുതുക: