പട്ടയം നൽകാമെന്ന് പറഞ്ഞ് അഞ്ച് മാസത്തിനിടെ നാല് ലക്ഷം രൂപ തട്ടിയെടുത്തു; സിപിഐ മണ്ഡലം സെക്രട്ടറിയെ മാറ്റി

തിരുവനന്തപുരം: പട്ടയം നൽകാമെന്ന് പറഞ്ഞ് നാല് ലക്ഷം രൂപ തട്ടിയെടുത്തെന്ന പരാതിയിൽ സിപിഐ മണ്ഡലം സെക്രട്ടറിയെ സ്ഥാനത്ത് നിന്ന് ഒഴിവാക്കി. നേമം മണ്ഡലം സെക്രട്ടറി കാലടി ജയചന്ദ്രനെയാണ് മാറ്റിയത്. ജില്ലാ എക്സിക്യൂട്ടീവിന്റെതാണു തീരുമാനം. അമ്പലത്തറ സ്വദേശി നൽകിയ പരാതിയിലാണു നടപടി.
പണം കൈമാറിയതിന്റെ തെളിവുകളും ഇയാൾ പാർട്ടി നേതൃത്വത്തിനു നൽകി.

ചാലയിൽ വാട്ടർ അതോറിറ്റി ഓഫിസിനു സമീപമുള്ള മൂന്ന് സെന്റിന് പട്ടയം നൽകാമെന്നായിരുന്നു വാഗ്ദാനം. 25 വർഷമായി ഷംനാദിന്റെ കൈവശമുള്ള ഭൂമിയാണിത്. തിരുവല്ലം സ്വദേശി സജിമോനാണ് പട്ടയം നൽകാമെന്നു വാദ്ഗാനം ചെയ്തത്. 10 ലക്ഷം രൂപയാണ് ജയചന്ദ്രൻ ആവശ്യപ്പെട്ടത്. പിന്നീട് 5.5 ലക്ഷം രൂപയ്‌ക്ക് ഇടപാട് ഉറപ്പിച്ചു.മുട്ടത്തറയിലെ വില്ലേജ് ഓഫിസിന്റെ മുന്നിൽവച്ച് 1.5 ലക്ഷം കൈമാറി.

ദിവസങ്ങൾക്കുശേഷം തിരുവനന്തപുരം താലൂക്ക് തഹസിൽദാറിന്റെ ഓഫിസിൽ കൊണ്ടുപോയി. ഉദ്യോഗസ്ഥർക്കു കൊടുക്കാനെന്ന പേരിൽ ഓഫിസിനു പുറത്തുവച്ച് 50,000 രൂപ ഗൂഗിൾ പേയിലൂടെ വാങ്ങി. 5 മാസത്തിനിടെ 4 ലക്ഷം രൂപ വാങ്ങിയതായി പരാതിയിൽ പറയുന്നു. അന്വേഷണത്തിൽ പട്ടയം ലഭിക്കുന്നതിനുള്ള അപേക്ഷപോലും വില്ലേജ് ഓഫിസിൽ നൽകിയിട്ടില്ലെന്നു വ്യക്തമായതായി ജില്ലാ സെക്രട്ടറിക്ക് നൽകിയ പരാതിയിൽ പറയുന്നു.