പാർശ്വവത്കരിക്കപ്പെട്ടവരുടെ ശബ്ദം; മണിപ്പൂർ ഹൈക്കോടതിയിലെ ആദ്യ വനിതാ ജഡ്ജിയായി വനവാസി

ഇംഫാൽ: മണിപ്പൂർ ഹൈക്കോടതിയിലെ ആദ്യ വനിതാ ജഡ്ജിയായി റിട്ട. ജുഡീഷ്യൽ ഓഫീസർ ഗോൽമി ഗൈഫുൽഷില്ലു കബായിയെ നിയമിച്ചു. വനവാസി വിഭാഗമായ നാഗാ വിഭാഗത്തിൽപ്പെട്ടയാളാണ് ഇവർ. തിങ്കളാഴ്ച സത്യപ്രതിജ്ഞയുണ്ടാകുമെന്നാണ് സൂചന.

മണിപ്പൂർ ഹൈക്കോടതിയുടെ ആദ്യ വനിതാ രജിസ്ട്രാറും രജിസ്ട്രാർ ജനറലും കൂടിയാണ് കബുയി. 1995-ൽ മണിപ്പൂർ ജുഡീഷ്യൽ സർവീസിലെ ഗ്രേഡ് III ഓഫീസറായി ജോലിയിൽ പ്രവേശിച്ച അവർ ഈ വർഷം മാർച്ചിൽ ഹൈക്കോടതി രജിസ്ട്രാർ ജനറലായി വിരമിച്ചു. മണിപ്പൂരിന്റെ തലസ്ഥാനമായ ഇംഫാലിലായിരുന്നു വിദ്യാഭ്യാസ കാലഘട്ടം മുഴുവനും.

ലിംഗപരമായ വിള്ളലുകൾ കുറയ്‌ക്കുന്നതിന് പുറമേ നിയമനിർമ്മാണത്തിന്റെ ഉയർന്ന തലങ്ങളിലേക്ക് സമൂഹത്തിന്റെ താഴെ തട്ടിലുള്ളവരും എത്തിപ്പെടുന്നതിന്റെ ഉദാഹരണമാണ് ഇത്. പാർശ്വവത്കരിക്കപ്പെട്ടവർ സമൂഹത്തിന്റെ മുഖ്യധാരയിലേക്ക് എത്തിപ്പെടുന്നു.