തിരുവനന്തപുരം : പൊതുവിദ്യാഭ്യാസ വകുപ്പ് കുട്ടികളുടെ ദേശീയ കാലാവസ്ഥാ സമ്മേളനം തിരുവനന്തപുരത്ത് സംഘടിപ്പിക്കുമെന്ന് മന്ത്രി വി.ശിവന്‍കുട്ടി. ഒക്‌ടോബര്‍ 16, 17, 18 തീയതികളില്‍ സംസ്ഥാന ശാസ്ത്ര സാങ്കേതിക മ്യൂസിയം ആന്റ് പ്രിയദര്‍ശിനി പ്ലാനിറ്റേറിയത്തിലാണ് കാലാവസ്ഥാ സമ്മേളനം സംഘടിപ്പിക്കുന്നത്.
ഗവേഷണ റിപ്പോര്‍ട്ടുകളുടെ അവതരണം, പോസ്റ്റര്‍ അവതരണങ്ങള്‍, ശാസ്ത്ര പ്രതിഭകളുമായുള്ള സംവാദം, പ്രദര്‍ശനങ്ങള്‍, ഫീല്‍ഡ് വിസിറ്റ് തുടങ്ങിയവ കുട്ടികളുടെ കാലാവസ്ഥാ സമ്മേളനത്തിന്റെ ഭാഗമാണ്. സംസ്ഥാനത്തെ ഹയര്‍ സെക്കണ്ടറി സ്‌കൂളുകളില്‍ കഴിഞ്ഞ അക്കാദമിക വര്‍ഷം സ്ഥാപിച്ച സ്‌കൂള്‍ കാലാവസ്ഥാ കേന്ദ്രങ്ങളുടെ തുടര്‍ പ്രവര്‍ത്തനത്തിന്റെ ഭാഗമായാണ് ദേശീയ കാലാവസ്ഥാ സമ്മേളനം സംഘടിപ്പിക്കുന്നത്.
സ്‌കൂള്‍ വെതര്‍ സ്‌റ്റേഷനുകള്‍ സ്ഥാപിച്ചതിന് ശേഷം കുട്ടികള്‍ അത് ഉപയോഗിച്ചു നടത്തി വന്ന പഠന പരീക്ഷണ പ്രവര്‍ത്തനങ്ങള്‍, വിദ്യാലയ പ്രദേശത്തെ ദിനാന്തരീക്ഷത്തില്‍ ഉണ്ടായ മാറ്റം തുടങ്ങിയവ മുന്‍ നിര്‍ത്തി വിദ്യാര്‍ഥികളുടെ ശാസ്ത്ര കൗതുകം വര്‍ധിപ്പിക്കാന്‍ ഭൗമ ശാസ്ത്രജ്ഞരെയും കാലാവസ്ഥാ നിരീക്ഷണ വിദഗ്‌ദ്ധരെയും മറ്റു സംസ്ഥാനങ്ങളില്‍ നിന്നുള്ള വിദഗദ്ധരെയും കുട്ടികളെയും പങ്കെടുപ്പിച്ചു കൊണ്ടുള്ള ദേശീയ സെമിനാര്‍ അത്തരത്തില്‍ ഇന്ത്യയില്‍ ആദ്യത്തേത് ആയിരിക്കുമെന്നും മന്ത്രി പറഞ്ഞു.
പ്രതികരിക്കാൻ ഇവിടെ എഴുതുക: