ഡെറാഡൂണ്‍: ഹസ്രത്ത് സാബിര്‍ മഖ്ദൂം ഷായുടെ 755-ാമത് ഉറൂസിനെത്തുന്ന വിശ്വാസികള്‍ക്ക് ഗംഗാജലവും ഗീതയും സമ്മാനിക്കും. ഉത്തരാഖണ്ഡിലെ പിരാന്‍ കാളിയാര്‍ ഷരീഫിലാണ് ലക്ഷക്കണക്കിന് തീര്‍ത്ഥാടകരെത്തുന്ന ഉറൂസിന് തുടക്കമാകുന്നത്.
ബംഗ്ലാദേശ്, പാകിസ്ഥാന്‍, ദക്ഷിണാഫ്രിക്ക തുടങ്ങിയ രാജ്യങ്ങളില്‍ നിന്നുള്ള തീര്‍ഥാടകരും ഇവിടെ എത്താറുണ്ട്. തീര്‍ത്ഥാടനത്തിന്റെ ഭാഗമായി പാകിസ്ഥാനില്‍ നിന്നുള്ള 110 വിശ്വാസികള്‍ ഇതിനകം റൂര്‍ക്കിയിലെത്തിയതായി വഖഫ് ബോര്‍ഡ് ചെയര്‍മാന്‍ ഷദാബ് ഷംസ് പറഞ്ഞു. സാഹോദര്യത്തിന്റെ സന്ദേശം പകരുന്നതിന്റെ ഭാഗമായാണ് ഗീതയും ഗംഗാജലവും ഇവര്‍ക്ക് നല്കുന്നതെന്ന് അദ്ദേഹം കൂട്ടിച്ചേര്‍ത്തു.
എല്ലാ രാജ്യങ്ങളും ഒരുമിച്ചുചേര്‍ന്ന് ലോകത്തിന്റെ ക്ഷേമത്തിനായി പ്രവര്‍ത്തിക്കണമെന്ന ആഹ്വാനമാണ് ഉറൂസ് മുന്നോട്ടുവയ്‌ക്കുന്നതെന്നും വസുധൈവ കുടുംബകം എന്നതാണ് ലോകമാകെ മുഴങ്ങുന്ന ആശയമെന്നും ഷദാബ് ഷംസ് പറഞ്ഞു. അഞ്ച് ദിവസത്തെ ഉറൂസ് പെരുന്നാളിനാണ് പിരാന്‍ കാളിയാര്‍ ഷരീഫില്‍ തുടക്കമായത്. ചതുര്‍ധാമങ്ങളുടെ നാടായ ഉത്തരാഖണ്ഡിലെ അഞ്ചാമത്തെ ധാം ആണ് സാബിര്‍ മഖ്ദൂം ഷായുടെ ദര്‍ഗയെന്ന് വഖഫ് ബോര്‍ഡ് ചെയര്‍മാന്‍ പറഞ്ഞു. 755 വര്‍ഷത്തിലേറെ പഴക്കമുണ്ട് ഇതിന്.
പ്രതികരിക്കാൻ ഇവിടെ എഴുതുക: