കോട്ടയം: കാക്കി കണ്ടാല്‍ കടിച്ചുകീറാനുള്ള പരിശീലനമാണ് നായ്‌ക്കള്‍ക്ക് നല്‍കിയിരിക്കുന്നത്. വീടിന് ചുറ്റുമുള്ള മതില്‍ക്കെട്ടിനുള്ളില്‍ സദാ നായ്ക്കളുടെ കാവല്‍. പുറത്ത് നായ്‌ക്കള്‍ക്കുള്ള ഹോസ്റ്റല്‍ എന്നാണ് പേരെങ്കിലും വന്‍ കഞ്ചാവ് വില്‍പനകേന്ദ്രമാണ് ആ വീട്. ഇപ്പോള്‍ പൊലീസ് പരിശോധന കര്‍ശനമാക്കിയതോടെ നായ്‌ക്കളെ പരിശീലിപ്പിക്കുന്നയാളും കഞ്ചാവ് കേന്ദ്രത്തിന്റെ മുഖ്യനുമായ റോബിന് ഒളിവിലാണ്.
പൊലീസെത്തിയാൽ ആക്രമിക്കുന്നതിനായി കാക്കി നിറത്തിലുള്ള തുണി കാണിച്ച് നായ്‌ക്കളെ കൊണ്ട് കടിച്ച് കീറി പരിശീലിപ്പിക്കുന്ന റോബിന്റെ സിസിടിവി ദൃശ്യങ്ങൾ മാധ്യമങ്ങള്‍ക്ക് ലഭിച്ചു. കോട്ടയത്ത് ഡോഗ് ഹോസ്റ്റലിന്റെ മറവിൽ വന്‍ കഞ്ചാവ് വില്പനയാണ് ഈ വീട് കേന്ദ്രീകരിച്ച് നടക്കുന്നത്.
കയ്യില്‍ കാക്കി തുണി ചുറ്റി നായ്‌ക്കളെക്കൊണ്ട് കടിപ്പിക്കുന്ന റോബിന്റെ നായ്‌ക്കളെ പരിശീലിപ്പിക്കുന്ന ദൃശ്യം ഇപ്പോള്‍ സമൂഹമാധ്യമങ്ങളില്‍ വൈറലാണ്. പൊലീസിനെ ആക്രമിക്കാൻ പ്രത്യേക പരിശീലനം ലഭിച്ച നായകളാണ് റോബിന്റെ ഉടമസ്ഥതയിലുള്ളത്.
കോട്ടയത്ത് ഡോഗ് ഹോസ്റ്റലിന്റെ മറവിൽ നടത്തി വന്നിരുന്ന കഞ്ചാവ് വില്പന കേന്ദ്രത്തില്‍ പൊലീസ് നടത്തിയ റെയ്ഡില്‍ 18 കിലോ കഞ്ചാവ് കണ്ടെടുത്തു. രഹസ്യവിവരത്തെ തുടർന്ന് നടത്തിയ ഓപ്പറേഷനിലൂടെയാണ് കഞ്ചാവ് വില്പന പൊലീസ് പിടികൂടിയത്. സ്ഥലത്തെത്തിയ പൊലീസ് സംഘത്തിന് നേരെ നായ്‌ക്കളെ അഴിച്ചു വിട്ട ശേഷം പ്രതി റോബിൻ ഓടി രക്ഷപ്പെടുകയായിരുന്നു. പ്രതിയ്‌ക്ക് വേണ്ടിയുള്ള തിരച്ചില്‍ പൊലീസ് കര്‍ശനമാക്കിയിട്ടുണ്ട്.
ഡോഗ് ഹോസ്റ്റലിന്റെ മറവിലാണ് കഴിഞ്ഞ ഒന്നര വർഷമായി കുമാരനല്ലൂർ സ്വദേശി റോബിൻ ലഹരി കച്ചവടം നടത്തിയിരുന്നത്. കോട്ടയം ജില്ലാ പൊലീസ് മേധാവിയുടെ ലഹരി വിരുദ്ധ സ്‌ക്വാഡിന് ലഭിച്ച രഹസ്യ വിവരമാണ് റോബിന്റെ ഹോസ്റ്റലിലേക്ക് പൊലീസിനെ എത്തിച്ചത്. ഞായറാഴ്ച രാത്രി 10.30 ഓടെ റോബിന്റെ കേന്ദ്രം പൊലീസ് വളഞ്ഞു. പുലർച്ചെ ഒരു മണിക്ക് കഞ്ചാവ് വാങ്ങാൻ എന്ന വ്യാജേന പൊലീസ് രണ്ടുപേരെ റോബിനടുത്തേക്ക് വിട്ടിരുന്നു. എന്നാല്‍ ഇവര്‍ പൊലീസാണെന്ന് തിരിച്ചറിഞ്ഞ റോബിൻ പ്രത്യേക പരിശീലനം നേടിയ വിദേശ നായ്‌ക്കളെ പൊലീസിന് നേരെ അഴിച്ചുവിട്ടു. തുടര്‍ന്ന് റോബിന് രക്ഷപ്പെട്ടു.
പ്രദേശത്ത് സ്ഥിരം ശല്യക്കാരൻ ആയിരുന്നു റോബിൻ എന്ന് നാട്ടുകാരും പറയുന്നു. സമീപവാസികളെ ആക്രമിക്കാൻ നായ്‌ക്കളെ അഴിച്ചുവിട്ട സംഭവത്തിൽ റോബിനെതിരെ വേറെയും കേസുകൾ ഉണ്ട്
റോബിൻ കോട്ടയം ജില്ല വിട്ടതായാണ് സംശയം. അന്തർ സംസ്ഥാന ലഹരി മാഫിയുമായുള്ള റോബിന് ബന്ധമുള്ളതായി സംശയിക്കുന്നു.
പ്രതികരിക്കാൻ ഇവിടെ എഴുതുക: