തൃശ്ശൂര്‍: കരുവന്നൂര്‍ സഹകരണ ബാങ്കില്‍ നിന്നു തട്ടിയ പണം പ്രതികള്‍ വിദേശത്തേക്കു കടത്തിയതായി ഇ ഡി കണ്ടെത്തല്‍. കേസിലെ പ്രധാന പ്രതിയും സിപിഎം നേതാക്കളുടെ ബിനാമിയുമായ പി. സതീഷ്‌കുമാറാണ് പണം ഹവാലയായി വിദേശത്തേക്കു കടത്തിയത്. സതീഷ്‌കുമാറിന്റെ പേരില്‍ ബഹ്റൈന്‍ കേന്ദ്രീകരിച്ച് വ്യവസായ സംരംഭങ്ങളുണ്ട്, ഇതില്‍ ചില സിപിഎം നേതാക്കള്‍ക്കു പങ്കാളിത്തവും.
ബഹ്റൈനിലുളള കമ്പനിയിലേക്ക് ഹവാല ശൃംഖല വഴിയാണ് പണം കടത്തിയത്. സതീഷ്‌കുമാറിന്റെ സന്തത സഹചാരിയും കേസിലെ മുഖ്യസാക്ഷിയുമായ തൃശ്ശൂര്‍ പാടൂക്കാട് സ്വദേശി ജിജോറിന്റെ മൊഴിയുടെ അടിസ്ഥാനത്തില്‍ ഇ ഡി ഇതു സംബന്ധിച്ച് പരിശോധിച്ചിരുന്നു.
കരുവന്നൂര്‍ സഹ. ബാങ്കിനു പുറമേ അയ്യന്തോള്‍, തൃശ്ശൂര്‍ സഹകരണ ബാങ്കുകള്‍ അടക്കമുള്ള മറ്റു ബാങ്കുകള്‍ വഴിയും സതീഷ്‌കുമാര്‍ കള്ളപ്പണം വെളുപ്പിച്ചു. നാട്ടില്‍ പണം പലിശയ്‌ക്കു കൊടുത്തതിന്റെ പേരില്‍ പലരില്‍ നിന്നും സതീഷ്‌കുമാര്‍ ഭൂമി എഴുതി വാങ്ങിയിട്ടുണ്ട്. ഇത്തരത്തില്‍ ഒന്‍പത് ആധാരങ്ങള്‍ സതീഷ്‌കുമാറിനും ഇടനിലക്കാരനും രജിസ്റ്റര്‍ ചെയ്തതായി തൃശ്ശൂരിലെ ആധാരമെഴുത്തുകാരന്‍ ജോഫി കൊള്ളന്നൂര്‍ മൊഴി നല്കിയിരുന്നു. ഈ ആധാരങ്ങളുടെ കമ്പ്യൂട്ടര്‍ പകര്‍പ്പുകള്‍ ഇ ഡി ശേഖരിച്ചു. തൃശ്ശൂര്‍, കണ്ണൂര്‍ ജില്ലകളിലായിരുന്നു സതീഷ്‌കുമാറിന്റെ ഇടപാടുകള്‍. സിപിഎം കേന്ദ്ര കമ്മിറ്റിയംഗം പി.കെ. ശ്രീമതിയുടെ ബന്ധുവെന്നാണ് ഇയാള്‍ സ്വയം പരിചയപ്പെടുത്തിയിരുന്നത്. ഇ.പി. ജയരാജന്‍, കെ.കെ. ശൈലജ എന്നിവരുമായും അടുത്ത ബന്ധം പുലര്‍ത്തിയിരുന്നു. ഇരുവരും തൃശ്ശൂരിലെത്തുമ്പോള്‍ സതീഷ്‌കുമാര്‍ പതിവായി കണ്ടിരുന്നു.
ഇ ഡി അന്വേഷണം നേരിടുന്ന തൃശ്ശൂര്‍ നഗരസഭാ കൗണ്‍സിലര്‍ അനൂപ് ഡേവിസ് കാട, വടക്കാഞ്ചേരി നഗരസഭ കൗണ്‍സിലര്‍ പി.ആര്‍. അരവിന്ദാക്ഷന്‍ എന്നിവര്‍ സതീഷ്‌കുമാറിന്റെ നിത്യസന്ദര്‍ശകരായിരുന്നു. എ.സി. മൊയ്തീന്റെ വടക്കാഞ്ചേരിയിലെ ഏജന്റായിരുന്നത് അരവിന്ദാക്ഷനാണ്. ജീപ്പ് ഡ്രൈവറായിരുന്ന അരവിന്ദാക്ഷന്‍ ഇപ്പോള്‍ കോടീശ്വരനായി. പണിയൊന്നുമില്ലാത്ത അനൂപ് ഡേവിസിന് അവിഹിതമായ സമ്പാദ്യമുണ്ട്, ഇരുവരും സിപിഎം ഏരിയ കമ്മിറ്റിയംഗങ്ങളും.
സതീഷ്‌കുമാറിന് നിക്ഷേപമുണ്ടെന്നു കരുതുന്ന എസ്ടി ജൂവലറി ഉടമയുടെ വീട്ടില്‍ നിന്ന് 800 ഗ്രാം സ്വര്‍ണവും 5.5 ലക്ഷം രൂപയും കണ്ടെടുത്തിരുന്നു. ഒളിവിലുള്ള അനി
ല്‍കുമാറിന്റെ വീട്ടില്‍ നിന്ന് 15 കോടി മൂല്യമുള്ള അഞ്ചു രേഖകളും എറണാകുളത്തെ വ്യവസായി ദീപക് സത്യപാലിന്റെ വീട്ടില്‍ നിന്ന് അഞ്ചു കോടി വിലമതിക്കുന്ന 19 രേഖകളും ഇ ഡി പിടികൂടി.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: