തൃശൂര്‍: കരുവന്നൂര്‍ ബാങ്ക് തട്ടിപ്പില്‍ സിപിഎമ്മിനെതിരേ ബാങ്ക് ഡയറക്ടര്‍ ബോര്‍ഡിലെ സിപിഐ അംഗങ്ങള്‍. സിപിഎം ചതിച്ചെന്ന് ഡയറക്ടര്‍ ബോര്‍ഡ് അംഗങ്ങളായ ലളിതനും സുഗതനും ആരോപിച്ചു. വലിയ ലോണുകള്‍ പാസാക്കിയത് ഭരണസമിതി അറിയാതെയാണ്. ബാങ്ക് സെക്രട്ടറി സുനില്‍കുമാറാണ് തങ്ങളെ വഞ്ചിച്ചത്. സുനില്‍ കുമാറിനും ബിജു കരീമിനുമാണ് എല്ലാം അറിയാമായിരുന്നത്.
ബാങ്ക് തട്ടിപ്പുമായി ഭരണസമിതി അംഗങ്ങള്‍ക്ക് യാതൊരു ബന്ധവുമില്ല. ഈ വായ്പകളൊന്നും സമിതി ശിപാര്‍ശ ചെയ്തിട്ടില്ലെന്ന് ഫയലുകള്‍ പരിശോധിച്ചാല്‍ മനസിലാവും. ഇതെല്ലാം സെക്രട്ടറി മിനിട്‌സില്‍ എഴുതിച്ചേര്‍ക്കുകയായിരുന്നെന്നും ഇവര്‍ ആരോപിച്ചു. എല്ലാം നടത്തിയത് സിപിഐഎമ്മാണെന്നും മുതിര്‍ന്ന നേതാക്കളെ രക്ഷിക്കാന്‍ ബലിയാടാക്കിയെന്നും ലളിതന്‍ പറഞ്ഞു. കേസില്‍ സത്യം പുറത്തുകൊണ്ടുവന്നത് എന്‍ഫോഴ്‌സ്‌മെന്റ് ഡയറക്ടറേറ്റാണെന്ന് അദ്ദേഹം പറഞ്ഞു. കേസില്‍ സിബിഐ അന്വേഷണം സ്വാഗതം ചെയ്യുന്നതായും ലളിതന്‍ പ്രതികരിച്ചു.
ഡയറക്ടര്‍ ബോര്‍ഡ് അംഗങ്ങളെ സിപിഎം ബലിയാടാക്കി. തട്ടിപ്പ് തിരിച്ചറിഞ്ഞ് പരാതിയുമായി ചെന്നപ്പോള്‍ സിപിഎം നേതാക്കള്‍ അവഗണിച്ചു. സിപിഐ സംസ്ഥാന സെക്രട്ടറി കാനം രാജേന്ദ്രനോട് പരാതി പറഞ്ഞിട്ടും ഒരു ഫലവും ഉണ്ടായില്ല. തട്ടിപ്പ് പുറത്തുവന്നതോടെ ഇരുവരിലും നിന്ന് പത്ത് കോടി രൂപ ഈടാക്കാന്‍ സഹകരണവകുപ്പ് തീരുമാനിച്ചിരുന്നു. ഇതിനിടെയാണ് ഇരുവരും സിപിഎമ്മിനെതിരെ രംഗത്തുവന്നത്.
പ്രതികരിക്കാൻ ഇവിടെ എഴുതുക: