കൊച്ചി: പുതുപ്പളളി ഉപതെരഞ്ഞെടുപ്പുമായി ബന്ധപ്പെട്ട ഭൂരിപക്ഷത്തെ കുറിച്ചുളള തര്‍ക്കത്തില്‍ ഒരാള്‍ക്ക് വെട്ടേറ്റു. കാലടി പൊതിയക്കര സ്വദേശി കുന്നേക്കാടന്‍ ജോണ്‍സനാണ് വെട്ടേറ്റ് ആശുപത്രിയിലായത്. സിപിഎം പൊതിയക്കര ബ്രാഞ്ച് സെക്രട്ടറി കുന്നേക്കാടന്‍ ദേവസിയാണ് ആക്രമിച്ചതെന്ന് ജോണ്‍സണ്‍ പറഞ്ഞു.
ദേവസിയെ പൊലീസ് കസ്റ്റഡിയിലെടുത്തു. തലയ്‌ക്ക് പരിക്കേറ്റ ജോണ്‍സണ്‍ അങ്കമാലിയിലെ സ്വകാര്യ ആശുപത്രിയില്‍ ചികിത്സയിലാണ്.
ലോറി ഡ്രൈവറാണ് ജോണ്‍സണ്‍. പുതുപ്പള്ളി ഉപതെരഞ്ഞെടുപ്പിലെ ഭൂരിപക്ഷവുമായി ബന്ധപ്പെട്ട് കഴിഞ്ഞ ദിവസങ്ങളില്‍ തര്‍ക്കം ഉണ്ടായിരുന്നു. ഇതേത്തുടര്‍ന്നാണ് ആക്രമണമുണ്ടായത്. ബുധനാഴ്ച രാവിലെ പൊതിയക്കരയിലായിരുന്നു ആക്രമണം ഉണ്ടായത്.
ബൈക്കിലെത്തിയ മൂന്നംഗസംഘമാണ് ആക്രമിച്ചതെന്ന് ജോണ്‍സണ്‍ പറഞ്ഞു. ശസ്ത്രക്രിയ നടത്തണമെന്നാണ് ആശുപത്രി അധികൃതര്‍ പറയുന്നത്. പൊലീസ് കേസെടുത്തു.
പ്രതികരിക്കാൻ ഇവിടെ എഴുതുക: