തിരുവനന്തപുരം: സി പി എം ആറ് തവണ തന്നെ കൊലപ്പെടുത്താന്‍ ശ്രമിച്ചതായി കെപിസിസി അധ്യക്ഷന്‍ കെ സുധാകരന്‍. തലനാരിഴയ്‌ക്കാണ് രക്ഷപ്പെട്ടത്. ഗൂഢാലോചന നടത്തിയവര്‍ പാര്‍ട്ടിയിലും സര്‍ക്കാരിലും ഉന്നത സ്ഥാനങ്ങളിലുള്ളവരാണെന്നും അദ്ദേഹം പറഞ്ഞു.
ഇതു സംബന്ധിച്ച കേസുകളില്‍ സാക്ഷികളെ കൊലപ്പെടുത്തുമെന്ന ഭീഷണി മൂലം ഒരു കേസിലും പ്രതികളെ ശിക്ഷിച്ചില്ലെന്നും സുധാകരന്‍ വെളിപ്പെടുത്തി.
ഇപ്പോഴും തന്നെ കൊലപ്പെടുത്താന്‍ ഗൂഡാലോചന തുടരുന്നുണ്ടെന്ന് പറഞ്ഞ സുധാകരന്‍ സിപിഎം എത്ര ശ്രമിച്ചാലും അത് നടക്കില്ലെന്നും വ്യക്തമാക്കി. ദൈവം വിച്ചാരിച്ചാലേ തന്നെ കൊലപ്പെടുത്താന്‍ കഴിയൂ എന്ന് ദൈവവിശ്വാസിയായ താന്‍ വിശ്വസിക്കുന്നു. ജീവന്‍ നല്‍കാന്‍ തയാറായി തന്നെ സംരക്ഷിക്കുന്ന പാര്‍ട്ടി പ്രവര്‍ത്തകര്‍ക്ക് വേണ്ടി താന്‍ ജീവന്‍ കൊടുത്തും പോരാടുമെന്ന് സുധാകരന്‍ പറഞ്ഞു.
പയ്യന്നൂര്‍, താഴെ ചൊവ്വ, മേലെ ചൊവ്വ, മട്ടന്നൂര്‍, പേരാവൂര്‍, കൂത്തുപറമ്പ് തുടങ്ങിയ സ്ഥലങ്ങളില്‍ നേരിട്ടുള്ള വധശ്രമങ്ങളാണ് നടന്നത്.താന്‍ അറിയാതെ നിരവധി വധശ്രമങ്ങള്‍ നടന്നിട്ടുണ്ട്. കാറിന്റെ നമ്പര്‍ പ്ലേറ്റ് മാറ്റിയും കാര്‍ മാറിക്കയറിയുമൊക്കെ രക്ഷപ്പെടുകയായിരുന്നു. ഡിസിസി അധ്യക്ഷനായി 1992ല്‍ ചുമതലയേറ്റ ശേഷമാണ് വധശ്രമ പരമ്പരകള്‍ ഉണ്ടായതെന്നും സുധാകരന്‍ പറഞ്ഞു.
പ്രതികരിക്കാൻ ഇവിടെ എഴുതുക: