സിഡ്‌നി : ഓസ്ട്രേലിയന് പ്രധാനമന്ത്രി ആന്റണി അല്‍ബനീസുമായി നടന്ന കൂടിക്കാഴ്ചയില്‍ ഓസ്ട്രേലിയയിലെ ക്ഷേത്രങ്ങള്‍ക്കു നേരെയുള്ള ആക്രമണങ്ങളിലും ഖാലിസ്ഥാന്‍ അനുകൂല ഘടകങ്ങളുടെ പ്രവര്‍ത്തനങ്ങളിലും ആശങ്ക അറിയിച്ച് പ്രധാനമന്ത്രി നരേന്ദ്ര മോദി.
ഓസ്ട്രേലിയയിലെ ക്ഷേത്രങ്ങള്‍ക്കു നേരെയുള്ള ആക്രമണങ്ങളെക്കുറിച്ചും വിഘടനവാദികളുടെ പ്രവര്‍ത്തനങ്ങളെക്കുറിച്ചും ഓസ്ട്രേലിയന് നേതാക്കളുമായി താന്‍ മുമ്പും ചര്‍ച്ച നടത്തിയിട്ടുണ്ട്. ഭാവിയിലും ഇത്തരം ഘടകങ്ങള്‍ക്കെതിരെ കര്‍ശന നടപടിയെടുക്കുമെന്ന് പ്രധാനമന്ത്രി അല്‍ബനീസ് ഒരിക്കല്‍ക്കൂടി തനിക്ക് ഉറപ്പുനല്‍കിയതായി കൂടിക്കാഴ്ചയ്‌ക്ക് ശേഷം പുറത്തിറക്കിയ സംയുക്ത പത്രപ്രസ്താവനയില്‍ മോദി പറഞ്ഞു.
പരസ്പര വിശ്വാസത്തിലും വിശ്വാസത്തിലും അധിഷ്ഠിതമാണ് ഇന്ത്യ-ഓസ്ട്രേലിയ ബന്ധം എന്ന് പ്രധാനമന്ത്രി മോദി പറഞ്ഞു.ഖനനത്തിലും നിര്‍ണായക ധാതുക്കളിലും തന്ത്രപരമായ സഹകരണം ശക്തിപ്പെടുത്തുന്നത് സംബന്ധിച്ച് ക്രിയാത്മകമായ ചര്‍ച്ചകള്‍ നടക്കുന്നുണ്ട്.
ഇന്ത്യ-ഓസ്ട്രേലിയ സമഗ്ര തന്ത്രപരമായ പങ്കാളിത്തം പുതിയ ഉയരങ്ങളിലേക്ക് കൊണ്ടുപോകുന്നതിനെക്കുറിച്ചാണ് ചര്‍ച്ച നടന്നതെന്നും നരേന്ദ്രമോദി കൂട്ടിച്ചേര്‍ത്തു. ഈ വര്‍ഷത്തെ ക്രിക്കറ്റ് ലോകകപ്പിനായി പ്രധാനമന്ത്രി ആന്റണി അല്‍ബനീസിനെയും എല്ലാ ഓസ്ട്രേലിയന് ക്രിക്കറ്റ് ആരാധകരെയും ഇന്ത്യയിലേക്ക് ക്ഷണിച്ചു.
ഇന്ത്യയും ഓസ്ട്രേലിയയും കുടിയേറ്റം , മൊബിലിറ്റി പങ്കാളിത്ത മേഖലയിലും ഹരിത ഹൈഡ്രജന്‍ ടാസ്‌ക് ഫോഴ്സിലും കരാറുകളില്‍ ഒപ്പുവച്ചു.
ഓസ്ട്രേലിയ-ഇന്ത്യ സമഗ്ര സാമ്പത്തിക സഹകരണ ഉടമ്പടി നേരത്തെ ഒപ്പുവയ്‌ക്കുന്നതിനുളള താത്പര്യം ഇരു രാജ്യങ്ങളും ആവര്‍ത്തിച്ചതായി ഓസ്ട്രേലിയന് പ്രധാനമന്ത്രി പറഞ്ഞു. ബെംഗളൂരുവില്‍ പുതിയ ഓസ്ട്രേലിയന് കോണ്‍സുലേറ്റ് സ്ഥാപിക്കുമെന്ന് ആന്റണി അല്‍ബനീസ് അറിയിച്ചു.
പ്രതികരിക്കാൻ ഇവിടെ എഴുതുക: