കൊച്ചി : ലഹരി ഉപയോഗിക്കുന്ന താരങ്ങളുടെ പേരുവിവരങ്ങള്‍ സര്‍ക്കാരിന് നല്‍കുന്നതില്‍ ഫെഫ്കയ്‌ക്ക് അതൃപ്തി. കഴിഞ്ഞ ദിവസം നിര്‍മാതാക്കള്‍ നടത്തിയ വാര്‍ത്താ സമ്മേളനത്തില്‍ താരങ്ങളില്‍ പലരും പരസ്യമായി ലഹരി ഉപയോഗിക്കുന്നുണ്ട്. ഇക്കാര്യം സര്‍ക്കാരിനെ അറിയിക്കുമെന്നാണ് വാര്‍ത്താ സമ്മേളനത്തില്‍ നിര്‍മാതാക്കളുടെ പ്രതിനിധികള്‍ അറിയിച്ചത്.
ഷെയ്ന്‍ നിഗം, ശ്രീനാഥ് ഭാസി എന്നീ താരങ്ങള്‍ ഷൂട്ടിങ് സെറ്റില്‍ ബോധമില്ലാത്തപോലെയാണ് പെരുമാറുന്നത്. ഇരുവരേയും സഹകരിപ്പിക്കേണ്ടതില്ലെന്നാണ് നിര്‍മാതാക്കളുടെ സംഘടന ആവശ്യപ്പെട്ടത്. ഇത് കൂടാതെ നിരവധി താരങ്ങള്‍ ലഹരി മരുന്ന് ഉപയോഗിക്കുന്നവരാണ്. ഇവരുടെ പട്ടിക സര്‍ക്കാരിന് കൈമാറുമെന്നുമായിരുന്നും നിര്‍മാതാക്കള്‍ അറിയിച്ചിരുന്നു. എന്നാല്‍ ചര്‍ച്ചചെയ്യാത്ത കാര്യം ഇത്തരത്തില്‍ വാര്‍ത്താ സമ്മേളനത്തില്‍ സംസാരിച്ചതിനെതിരെയാണ് ഫെഫ്ക ഇപ്പോള്‍ രംഗത്ത് എത്തിയിരിക്കുന്നത്.
താരങ്ങളുടെ ലഹരി ഉപയോഗം സംബന്ധിച്ച് തെളിവുകളൊന്നുമില്ല. അതിനാല്‍ ഇക്കാര്യം വെളിപ്പെടുത്താന്‍ സാധിക്കില്ല. സര്‍ക്കാരിന് പേരു നല്‍കിയാല്‍ തെളിവ് നല്‍കേണ്ടിവരും. താരങ്ങളുടെ കാരവാനില്‍ കയറി പരിശോധിക്കാനൊന്നും സാധിക്കില്ല. പ്രമുഖ താരങ്ങളുടെ പേര് വിവരങ്ങള്‍ ഊഹാപോഹങ്ങളുടെ അടിസ്ഥാനത്തില്‍ നല്‍കാന്‍ സാധിക്കില്ലെന്നാണ് ഫെഫ്ക അറിയിച്ചിട്ടുള്ളത്.
ഷെയിന്‍ നിഗം, ശ്രീനാഥ് ഭാസി എന്നിവരെപ്പറ്റിയാണ് കഴിഞ്ഞ ദിവസം നടന്ന യോഗത്തില്‍ പ്രധാനമായും ചര്‍ച്ച വന്നത്. ഇരുവരും പ്രതിഭയുള്ള നടന്മാര്‍ ആണെങ്കിലും ഇരുവരും പലപ്പോഴും വിവാദങ്ങളില്‍ അകപ്പടുകയും ഷൂട്ടിങ് സ്ഥലങ്ങളിലും പ്രശ്‌നങ്ങള്‍ ഉണ്ടാക്കിയിട്ടുള്ളതാണ്. അതിന്റെ പശ്ചാത്തലത്തിലാണ് നടപടി വേണമെന്ന് ആവശ്യപ്പെട്ടിരിക്കുന്നത്.
പ്രതികരിക്കാൻ ഇവിടെ എഴുതുക: