ഗുരുവായൂര്‍: റിലയന്‍സ് ഇന്‍ഡസ്ട്രീസ് ചെയര്‍മാന്‍ മുകേഷ് അംബാനി ഇന്നു വൈകീട്ട് ഗുരുവായൂര്‍ ക്ഷേത്രദര്‍ശനം നടത്തി. ഇളയ മകന്‍ ആനന്ദിന്റെ പ്രതിശ്രുത വധു രാധികാ മര്‍ച്ചന്റ്, റിലയന്‍സ് ഡയറക്ടര്‍ മനോജ് മോദി എന്നിവര്‍ക്കൊപ്പമാണ് മുകേഷ് ഗുരുവായൂരിലെത്തിയത്. ശ്രീവല്‍സം ഗസ്റ്റിനു സമീപം തെക്കേ നടപ്പന്തലിന് മുന്നില്‍ വെച്ച് ദേവസ്വം ചെയര്‍മാന്‍ ഡോ. വി.കെ. വിജയന്‍, ഭരണസമിതി അംഗങ്ങളായ സി. മനോജ്, ചെങ്ങറ സുരേന്ദ്രന്‍, അഡ്വ. കെ.വി. മോഹനകൃഷ്ണന്‍, ദേവസ്വം അഡ്മിനിസ്‌ട്രേറ്റര്‍ കെ.പി. വിനയന്‍ എന്നിവര്‍ ചേര്‍ന്ന് അദ്ദേഹത്തെ സ്വീകരിച്ചു.
ഡോ. വി.കെ. വിജയന്‍ പൊന്നാടയണിയിച്ചു. കുറച്ചു കാലമായി കണ്ണനെ കാണാന്‍ വന്നിട്ട്, ഇപ്പോള്‍ വരാനായി, വളരെ സന്തോഷം, സ്വീകരണത്തിന് മുകേഷ് നന്ദി പറഞ്ഞു. തുടര്‍ന്ന് ക്ഷേത്രത്തിലെത്തി നമസ്‌കാര മണ്ഡപ സമീപത്തെ വിളക്കില്‍ നെയ്യര്‍പ്പിച്ച് ഭഗവാനെ വണങ്ങി. മുകേഷ് അംബാനിക്കും സംഘത്തിനും ഗുരുവായൂരപ്പന്റെ പ്രസാദ കിറ്റും നല്‍കി. ക്ഷേത്ര കാര്യങ്ങള്‍ എല്ലാം ചെയര്‍മാനോട് ചോദിച്ചറിഞ്ഞ അദ്ദേഹം കാണിക്കയായി 1.51 കോടിയുടെ ചെക്ക് അന്നദാന ഫണ്ടിലേക്ക് സംഭാവന നല്‍കി.
20 മിനിട്ടോളം ക്ഷേത്രത്തില്‍ ചെലവഴിച്ച അദ്ദേഹം അഞ്ചരയോടെ ദര്‍ശനം പൂര്‍ത്തിയാക്കി. കിഴക്കേ ഗോപുര കവാടത്തിന് മുന്നില്‍ വെച്ച് ഡോ. വി.കെ. വിജയന്‍ അംബാനിക്ക് ദേവസ്വത്തിന്റെ ഉപഹാരവും സമ്മാനിച്ചു. ഗുരുവായൂര്‍ ദേവസ്വം മള്‍ട്ടി സ്‌പെഷ്യാലിറ്റി ആശുപത്രിക്ക് സഹായം നല്‍കുന്ന കാര്യം അനുഭാവപൂര്‍വ്വം പരിഗണിക്കുമെന്ന് മുകേഷ് അംബാനി പറഞ്ഞു. ഗുരുവായൂരില്‍ മള്‍ട്ടി സ്‌പെഷ്യാലിറ്റി ആശുപത്രി തുടങ്ങാനുള്ള പദ്ധതിക്ക് സഹായം അഭ്യര്‍ത്ഥിച്ച് ദേവസ്വം ചെയര്‍മാന്‍ നല്‍കിയ നിവേദനത്തിനുള്ള മറുപടിയായാണ് അദ്ദേഹത്തിന്റെ പ്രതികരണം.
പ്രതികരിക്കാൻ ഇവിടെ എഴുതുക: