കൊല്ലം: കാഷ്യൂ കോര്‍പ്പറേഷന്‍ ഫാക്ടറികളില്‍ ഓണാഘോഷത്തിന് തുടക്കമായി. കാഷ്യൂ കോര്‍പ്പറേഷന്‍ ചെയര്‍മാന്‍ എസ്. ജയമോഹന്‍ ഉദ്ഘാടനം ചെയ്തു. കരുനാഗപ്പള്ളി ആദിനാട് ഫാക്ടറിയിലാണ് ഓണാഘോഷത്തിന് തുടക്കം കുറിച്ചത്. തിരുവാതിര, കമ്പടികളി, ഒപ്പന, നാടന്‍പാട്ട് എന്നിവ കശുവണ്ടി തൊഴിലാളികള്‍ അവതരിപ്പിച്ചു. മാവേലി വേഷത്തില്‍ തൊഴിലാളികള്‍ക്കും, നാട്ടുകാര്‍ക്കും ഓണസന്ദേശം നല്‍കി. കൂടാതെ തൊഴിലാളികള്‍ ഓണസദ്യയും ഒരുക്കി.
അസുഖബാധിതരായ തൊഴിലാളികള്‍ക്ക് 5000 രൂപ വീതം കോര്‍പ്പറേഷന്‍ പ്രത്യേക ധനസഹായം നല്‍കി. തുടര്‍ന്നുള്ള ദിവസങ്ങളില്‍ മറ്റു ഫാക്ടറികളിലും ഓണാഘോഷങ്ങള്‍ സംഘടിപ്പിക്കും. കാഷ്യൂ കോര്‍പ്പറേഷന്‍ ബോണസ് അഡ്വാന്‍സ് സെപ്തംബര്‍ 2, 3 തീയതികളില്‍ വിതരണം ചെയ്യും. മാനേജിംഗ് ഡയറക്ടര്‍ ഡോ. രാജേഷ് രാമകൃഷ്ണന്‍, മെറ്റിരിയല്‍സ് മാനേജര്‍ സുനില്‍ ജോണ്‍, കൊമേഷ്യല്‍ മാനേജര്‍ ഷാജി .വി, ഫാക്ടറി മാനേജര്‍ എന്നിവരും സംബന്ധിച്ചു.
പ്രതികരിക്കാൻ ഇവിടെ എഴുതുക: