ന്യൂദല്‍ഹി: എന്‍ഡിഎയുടെ രാഷ്ട്രപതി സ്ഥാനാര്‍ത്ഥി ദ്രൗപദീ മുര്‍മൂവിനെ പിന്തുണയ്ക്കണമെന്ന് ശിവസേന എംപിമാര്‍ മഹാരാഷ്‌ട്ര മുന്‍ മുഖ്യമന്ത്രി ഉദ്ധവ് താക്കറെയോട് ആവശ്യപ്പെട്ടു. ഉദ്ധവ് മുംബൈയില്‍ വിളിച്ചുചേര്‍ത്ത പാര്‍ട്ടി എംപിമാരുടെ യോഗത്തില്‍ പങ്കെടുത്ത 16 പേരും മുര്‍മൂവിനെ പിന്തുണയ്ക്കണമെന്ന് ആവശ്യപ്പെടുകയായിരുന്നു.
വനവാസി സമൂഹത്തില്‍ നിന്നുള്ള മുര്‍മൂവിനെ പിന്തുണയ്‌ക്കണമെന്ന ആവശ്യം 16 എംപിമാരും അംഗീകരിച്ചതായി യോഗത്തിനുശേഷം എംപി ഗജാനന്‍ കീര്‍ത്തികര്‍ പറഞ്ഞു. ഒന്നോ രണ്ടോ ദിവസത്തിനുള്ളില്‍ തീരുമാനം അറിയിക്കാമെന്ന് ഉദ്ധവ് പറഞ്ഞെന്നും ഗജാനന്‍ കീര്‍ത്തികര്‍ അറിയിച്ചു.
പതിനെട്ട് എംപിമാരില്‍ രണ്ട് പേര്‍ യോഗത്തില്‍ പങ്കെടുത്തില്ല. ഭാവന ഗവാലിയും ശ്രീകാന്ത് ഷിന്‍ഡെയുമാണ് വിട്ടുനിന്നത്. ഉദ്ധവ് താക്കറെയുമായി അടുത്ത ബന്ധം പുലര്‍ത്തുന്ന സഞ്ജയ് റാവത്ത് എംപി യോഗത്തിനുശേഷം മാധ്യമങ്ങളോട് പ്രതികരിക്കാന്‍ തയ്യാറായില്ല.
പ്രതികരിക്കാൻ ഇവിടെ എഴുതുക: