തൂത്തൂവാരി ഇംഗ്ലണ്ട്; ന്യൂസിലന്‍ഡിനെതിരായ മൂന്നാം ടെസ്റ്റിലും ജയം

ലീഡ്‌സ്: ലോക ചാമ്പ്യന്മാരായ ന്യൂസിലന്‍ഡിനെതിരായ ടെസ്റ്റ് പരമ്പര ഇംഗ്ലണ്ട് തൂത്തുവാരി (3-0). ജയിക്കാന്‍ 296 റണ്‍സ് വേണ്ടിയിരുന്ന ഇംഗ്ലണ്ട് അവസാന ദിവസം മൂന്ന് വിക്കറ്റ് നഷ്ടത്തില്‍ ലക്ഷ്യം കണ്ടു. സ്‌കോര്‍: ന്യൂസിലന്‍ഡ് – 329, 326, ഇംഗ്ലണ്ട് – 360, 296/3.  

മഴ മൂലം വൈകിയാണ് ഇന്നലെ കളി തുടങ്ങിയത്. രണ്ട് വിക്കറ്റിന് 183 എന്ന നിലയില്‍ അവസാന ദിനം രണ്ടാമിന്നിങ്‌സ് ബാറ്റിങ് തുടര്‍ന്ന ഇംഗ്ലണ്ട് അനായാസം ലക്ഷ്യത്തിലെത്തി. 81 റണ്‍സുമായി ഒലി പോപ്പും 55 റണ്‍സുമായി ജോ റൂട്ടുമായിരുന്നു ക്രീസില്‍. തന്റെ സ്‌കോറിലേക്ക് ഒരു റണ്‍ കൂടി ചേര്‍ത്തതിനു പിന്നാലെ ഒലി പോപ്പിനെ സൗത്തി ക്ലീന്‍ബൗള്‍ഡ് ചെയ്തു.  

എന്നാല്‍, റൂട്ടിനൊപ്പം ചേര്‍ന്ന ജോണി ബെയര്‍സ്റ്റൗ അതിവേഗത്തില്‍ ബാറ്റ് വീശിയതോടെ ഇംഗ്ലീഷ് ജയം അനായാസമായി. 44 പന്തില്‍ ബെയര്‍സ്റ്റൗ പുറത്താകാതെ 71 റണ്‍സെടുത്തു. റൂട്ട് 86 റണ്‍സുമായി പുറത്താകാതെ നിന്നു. രണ്ടിന്നിങ്‌സിലും അഞ്ച് വീതം വിക്കറ്റെടുത്ത ജാക്ക് ലീച്ചാണ് കളിയിലെ താരം. ജോ റൂട്ട് പരമ്പരയുടെ താരമായി.  

നായകനായി അരങ്ങേറ്റം കുറിച്ച പരമ്പരയില്‍ സമ്പൂര്‍ണ ജയം നേടാനായത് ബെന്‍ സ്റ്റോക്‌സിന് നേട്ടമായി. ഇന്ത്യക്കെതിരെയുള്ള ടെസ്റ്റില്‍ ആത്മവിശ്വാസത്തോടെ ഇറങ്ങാന്‍ ഇംഗ്ലണ്ടിനാകും. പരമ്പരയില്‍ ഇന്ത്യ 2-1ന് മുന്‍പിലാണ്.