ഏറ്റുമാനൂര്‍: പട്ടിത്താനത്ത് ലോറിയും ഓട്ടോറിക്ഷയും കൂട്ടിയിടിച്ച് ഓട്ടോ ഡ്രൈവര്‍ മരിച്ചു. ഇടിയുടെ ആഘാതത്തില്‍ റോഡിലേക്ക് തെറിച്ച് വീണ ഓട്ടോറിക്ഷാ ഡ്രൈവറുടെ തലയിലൂടെ ലോറിയുടെ ചക്രം കയറിയിറങ്ങി. കടപ്പൂര്‍ മുല്ലപ്പിലാക്കില്‍ നീലകണ്ഠന്‍ നായരുടെ മകന്‍ ദിലീപ്(43) ആണ് മരിച്ചത്. എം.സി റോഡില്‍ ഏറ്റുമാനൂര്‍ പട്ടിത്താനത്ത് ചൊവ്വാഴ്ച രാവിലെ ഒമ്പതിന് ഗ്യാസ് ഗോഡൗണിനു മുന്‍വശത്താണ് അപകടമുണ്ടായത്.
കടപ്പൂര്‍ കരിമ്പിന്‍കാല സ്റ്റാന്‍ഡിലെ ഓട്ടോറിക്ഷാ ഡ്രൈവറായ ദിലീപ് ഗ്യാസ് സിലണ്ടര്‍ എടുക്കുന്നതിനായി തവളക്കുഴിയിലെ ഗ്യാസ് ഏജന്‍സിയിലേയ്‌ക്ക് വരികയായിരുന്നു. ഇതിനിടെ കുറവിലങ്ങാട് ഭാഗത്തേയ്‌ക്ക് പോകുകയായിരുന്ന തമിഴ്നാട് രജിസ്ട്രേഷന്‍ നാഷണല്‍ പെര്‍മ്മിറ്റ് ലോറി മറ്റൊരു ലോറിയെ മറികടക്കുന്നതിനിടെ ദിലീപിന്റെ ഓട്ടോറിക്ഷയില്‍ ഇടിയ്‌ക്കുകയായിരുന്നു.
ദിലീപിന്റെ മൃതദേഹം ഏറ്റുമാനൂര്‍ പോലീസ് കോട്ടയം മെഡിക്കല്‍ കോളജ് മോര്‍ച്ചറിയിലേയ്‌ക്ക് മാറ്റി. അപകടത്തെതുടര്‍ന്ന് ഏറ്റുമാനൂര്‍ കുറവിലങ്ങാട് റൂട്ടില്‍ അരമണിക്കൂറോളം ഗതാഗതം തടസപ്പെട്ടു. കുറവിലങ്ങാട്, ഏറ്റുമാനൂര്‍ പോലീസ് എത്തിയാണ് ഗതാഗതം പുനസ്ഥാപിച്ചത്. കോട്ടയത്ത് നിന്ന് ഫയര്‍ ഫോഴ്സ് എത്തി റോഡ് കഴുകി വൃത്തിയാക്കി. അപകടമുïാക്കിയ വാഹനം ഏറ്റുമാനൂര്‍ പോലീസ് കസ്റ്റഡിയിലെടുത്തു.
പ്രതികരിക്കാൻ ഇവിടെ എഴുതുക: