തിരുവനന്തപുരം: കേന്ദ്ര സര്‍ക്കാര്‍ ഏര്‍പ്പെടുത്തിയ സംപ്രേഷണ വിലക്കിനെതിരെ മീഡിയ വണ്‍ നല്‍കിയ ഹര്‍ജി തള്ളിയതിനെ തുടര്‍ന്ന് വിലക്ക് നിലവില്‍ വന്നെങ്കിലും കോടതി വിധി ലംഘിച്ച് ചാനല്‍. കേന്ദ്രസര്‍ക്കാര്‍ ഉത്തരവ് പ്രകാരം എല്ലാ പ്ലാറ്റ്‌ഫോമുകളില്‍ നിന്നും ചാനലിന് വിലക്കേര്‍പ്പെടുത്തിയിരുന്നു. ഇതിനെ തുടര്‍ന്ന് ആദ്യഘട്ടത്തില്‍ എല്ലാ പ്ലാറ്റ്‌ഫോമുകളില്‍ നിന്നും ചാനല്‍ അപ്രത്യക്ഷമായിരുന്നു. തുടര്‍ന്നാണ് കേന്ദ്രസര്‍ക്കാര്‍ ഉത്തരവിന് സ്റ്റേ നല്കിയത്. എന്നാല്‍, ഇന്ന് കേന്ദ്രസര്‍ക്കാര്‍ നടപടി ശരിവച്ചതോടെ സംപ്രേഷണം അവസാനിപ്പിക്കുകയാണെന്ന് എഡിറ്റ് പ്രമോദ് രാമന്‍ വ്യക്തമാക്കുകയും സാറ്റ്‌ലൈറ്റ് സംപ്രേഷണം അവസാനിപ്പിക്കുകയും ചെയ്തിരുന്നു. എന്നാല്‍, വിധി വന്ന് മണിക്കൂറുകള്‍ കഴിഞ്ഞിട്ടും യൂട്യൂബില്‍ മീഡിയ വണ്‍ തത്സമയം സംപ്രേഷണം തുടരുകയാണ്. ഇതിനെതിരേ സോഷ്യല്‍മീഡയയില്‍ വലിയ വിമര്‍ശനം ഉയര്‍ന്നു കഴിഞ്ഞു. കോടതി വിധിയുടെ ലംഘനമാണിതെന്ന് ഭൂരിപക്ഷം ആള്‍ക്കാരും പ്രതികരിച്ചു. കമന്റ് ബോക്‌സ് ഓഫ് ചെയ്തിട്ടാണ് യൂട്യൂബില്‍ മീഡിയ വണ്‍ സംപ്രേഷണം തുടരുന്നത്.
കേന്ദ്ര സര്‍ക്കാര്‍ ഏര്‍പ്പെടുത്തിയ സംപ്രേഷണ വിലക്കിനെതിരെ മീഡിയ വണ്‍ നല്‍കിയ ഹര്‍ജി ഇന്നു രാവിലെയാണ് ഹൈക്കോടതി തള്ളിയത്. ചാനലിനെതിരായ കണ്ടെത്തലുകള്‍ അതീവ ഗുരുതരമെന്നും കേന്ദ്ര നിലപാട് ശരിയാണെന്നും കോടതി വിലയിരുത്തി. കോടതി ആവശ്യപ്പെട്ട, വിലക്കുമായി ബന്ധപ്പെട്ട ആഭ്യന്തര മന്ത്രാലയത്തിന്റെ മുഴുവന്‍ ഫയലുകളും കേന്ദ്ര സര്‍ക്കാരിന്റെ അസി. സോളിസിറ്റര്‍ ജനറല്‍ എസ്. മനു കോടതിക്ക് കൈമാറിയിരുന്നു. മുദ്ര വച്ച കവറില്‍ നല്കിയത് രഹസ്യരേഖകളായതിനാല്‍ അവ മീഡിയ വണ്ണിന്റെ അഭിഭാഷകന് കൈമാറാനാവില്ലെന്ന് കോടതി വ്യക്തമാക്കി. ആഭ്യന്തര മന്ത്രാലയത്തിന്റെ കണ്ടെത്തലുകള്‍ ചാനലിനല്ല അതു നടത്തുന്ന കമ്പനിക്ക് തന്നെ എതിരാണെന്ന് അസി. സോളിസിറ്റര്‍ ജനറല്‍ ചൂണ്ടിക്കാട്ടി. ഈ സമയത്താണ് ഫയലുകള്‍ പരിശോധിച്ച് ഇന്ന് വിധി പറയുമെന്നും അതുവരെ ഒരു ദിവസത്തേക്ക് വിലക്കിനുള്ള സ്റ്റേ നീട്ടുകയാണെന്നും ജസ്റ്റിസ് എന്‍. നഗരേഷ് കഴിഞ്ഞ ദിവസം പറഞ്ഞു.
മാധ്യമസ്വാതന്ത്ര്യമെന്നത് കടഞ്ഞാണില്ലാത്ത ഒന്നല്ലെന്നും സുരക്ഷാ കാര്യങ്ങള്‍ പരിഗണിച്ച് നിയന്ത്രണം ഏര്‍പ്പെടുത്താന്‍ സാധിക്കുമെന്നും അസി. സോളിസിറ്റര്‍ ജനറല്‍ ചൂണ്ടിക്കാട്ടി. ഒരിക്കല്‍ ആഭ്യന്തര മന്ത്രാലയം അനുമതി നല്കിയെന്നതിനാല്‍ വീണ്ടും ഇക്കാര്യം പുനപരിശോധിക്കരുതെന്നൊന്നുമില്ല. സംപ്രേഷണാനുമതി അപേക്ഷകളില്‍ ആഭ്യന്തര മന്ത്രാലയം പത്തു വര്‍ഷത്തേക്കാണ് അനുമതി നല്കുന്നത്. പത്തു വര്‍ഷം കഴിഞ്ഞ് സ്ഥിതിഗതികള്‍ മാറാം. പത്തു വര്‍ഷം കഴിഞ്ഞ്, അനുമതി പുതുക്കാനും പുതിയ ലൈസന്‍സ് നല്കുന്നതിനുള്ള വ്യവസ്ഥകള്‍ തന്നെയാണ് പാലിക്കേണ്ടത്, അദ്ദേഹം പറഞ്ഞു. 2010 മുതല്‍ 2020 വരെ തങ്ങള്‍ പ്രവര്‍ത്തിച്ചു, ഒരു പരാതിയും ഉണ്ടായില്ലെന്ന മീഡിയ വണ്ണിന്റെ വാദത്തിനു മറുപടി നല്‍കുകയായിരുന്നു അദ്ദേഹം.
പ്രതികരിക്കാൻ ഇവിടെ എഴുതുക: