മൂന്നാര്‍: സംസ്ഥാനത്തെ ഏക ഗോത്രവര്‍ഗ പഞ്ചായത്തായ ഇടമലക്കുടി പഞ്ചായത്തിലെ ഇഡ്ഡലിപാറ കുടിയിലെ നൂറോളം കുടുംബങ്ങളുടെ ദാഹമകറ്റി സുരേഷ് ഗോപി എംപി. എംപി ഫണ്ടില്‍ നിന്ന് പദ്ധതിക്കായി തുക അനുവദിച്ചെങ്കിലും ഇത് വിവിധ കാരണങ്ങള്‍ പറഞ്ഞ് ഉപയോഗിക്കാതെ വന്നതോടെ മകളുടെ പേരുള്ള ട്രസ്റ്റില്‍ നിന്ന് പൈപ്പ് വാങ്ങിക്കാനായി പണം നല്കുകയായിരുന്നു.
പഞ്ചായത്തിലെ 9, 10 വാര്‍ഡുകളായ തെക്കെ-ഇഡ്ഡലിപ്പാറക്കുടി, വടക്കെ ഇഡ്ഡലിപ്പാറക്കുടി എന്നിവിടങ്ങളില്‍ ഏറെക്കാലമായി കുടിവെള്ള ക്ഷാമം രൂക്ഷമാണ്. ഡിസംബറില്‍ ഇവിടെയെത്തിയ ബിജെപി നേതാക്കളോട് കുടി നിവാസികള്‍ ആവശ്യം അറയിച്ചിരുന്നു. ബിജെപി ഇടുക്കി ജില്ലാ നേതൃത്വം വിഷയം സുരേഷ് ഗോപി എംപിയെ അറിയിച്ചു. എംപി ഫണ്ടില്‍ നിന്ന് 12 ലക്ഷം ജില്ലാ കളക്ടര്‍ക്ക് അനുവദിക്കുകയും ചെയ്തു. എന്നാല്‍ ഇടമലക്കുടി പഞ്ചായത്തില്‍ സര്‍ക്കാര്‍ സംവിധാനത്തില്‍ അനുവദിക്കുന്ന ഫണ്ട് മുഖാന്തരം പദ്ധതി നടപ്പിലാക്കുന്നതിന് വനംവകുപ്പ് അനുമതി വേണമെന്നതിനാല്‍ പദ്ധതി നടപ്പിലാക്കുന്നത് നീളുകയായിരുന്നു. ഇത് മനസ്സിലാക്കിയ എംപി തന്റെ മകളുടെ പേരിലുള്ള ട്രസ്റ്റില്‍ നിന്ന് നിന്ന് ഏഴു ലക്ഷം രൂപ ഇതിനായി അനുവദിച്ചു. പിന്നാലെ 3.25 കി.മീ. ദൂരത്തുള്ള വെള്ളവരയില്‍ നിന്ന് ഇഡ്ഡലിപാറയിലേക്ക് വെള്ളമെത്തിക്കുന്നതിന് ആവശ്യമായ എച്ച്.ഡി. പൈപ്പ് വാങ്ങി നല്കി കുടിവെള്ള ക്ഷാമം പരിഹരിക്കാന്‍ നടപടി അടിയന്തരമായി ഇടപെടുകയായിരുന്നു.
കോട്ടയത്ത് നിന്ന് പൈപ്പ് ലോറിയില്‍ കയറ്റി പെട്ടിമുടിയിലെത്തിച്ച് ഉപഭോക്താക്കള്‍ക്ക് കൈമാറി. ബിജെപി ജില്ലാ ജന. സെക്രട്ടറി വി.എന്‍. സുരേഷ്, ജില്ലാ സെല്‍ കോ-ഒര്‍ഡിനേറ്റര്‍ സോജന്‍ ജോസഫ്, അടിമാലി മണ്ഡലം ജന. സെക്രട്ടറി ബി. മനോജ് കുമാര്‍ എന്നിവര്‍ പൈപ്പുകള്‍ ഇവിടെ എത്തിച്ച് നല്കി. മേഖല പ്രസിഡന്റ് എന്‍. ഹരി, ജില്ലാ പ്രസിഡന്റ് കെ.എസ്. അജി എന്നിവരാണ് എംപിയുമായി ബന്ധപ്പെട്ട് നടപടികള്‍ ഏകോപിപ്പിച്ചത്.
ഉപഭോക്താക്കള്‍ പൈപ്പുകള്‍ പിന്നീട് ജിപ്പിലും തലച്ചുമടായും കുടികളിലേക്ക് കൊണ്ടുപോയി. പദ്ധതി ഇവര്‍ തന്നെ നേരിട്ടാണ് നടപ്പിലാക്കുന്നത്. കുടിയിലെ പടുതാക്കുളത്തിലേക്കാണ് പൈപ്പ് വഴി വെള്ളമെത്തിക്കുന്നത്. പിന്നീട് ഇവിടെ നിന്നാണ് വിതരണം നടത്തുക. കഴിഞ്ഞ ഉപതെരഞ്ഞെടുപ്പില്‍ ഒന്‍പതാം വാര്‍ഡിലെ ബിജെപി സ്ഥാനാര്‍ത്ഥി ചിന്താമണി ഒരു വോട്ടിനാണ് വിജയിച്ചത്.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: