ആശങ്കാജനകമായ പുതിയ കോവിഡ് വൈറസ് വകഭേദം; ദക്ഷിണാഫ്രിക്കയില്‍ നിന്നുള്ള വിമാനങ്ങള്‍ക്ക് നിരോധനം

ബ്രസ്സല്‍സ്: എളുപ്പം പകരുന്ന ഉഗ്രശേഷിയുള്ള പുതിയ കോവിഡ് വൈറസ് വകഭേദം കണ്ടെത്തിയതോടെ ദക്ഷിണാഫ്രിക്കയില്‍ നിന്നുള്ള വിമാനങ്ങള്‍ക്ക് നിരോധനം. ദക്ഷിണാഫ്രിക്കയില്‍ നിന്നുള്ള വിമാനങ്ങള്‍ക്ക് നിരോധനം ഏര്‍പ്പെടുത്തിയതായി യൂറോപ്യന്‍ യൂണിയന്‍ എക്‌സിക്യൂട്ടീവ് ഉര്‍സുല വൊന്‍ ഡെര്‍ ലെയെന്‍സ് പറഞ്ഞു.

യൂറോപ്യന്‍ യൂണിയന്‍ അംഗങ്ങളായ മിക്ക രാജ്യങ്ങളും ദക്ഷിണാഫ്രിക്കയില്‍ നിന്നുള്ള വിമാനങ്ങള്‍ക്ക് വിലക്കേര്‍പ്പെടുത്തി. ദക്ഷിണാഫ്രിക്ക, ബോട്‌സ് വാന, ഹോങ്കോങ് എന്നിവിടങ്ങളിലാണ് വൈറസിന്റെ ഈ പുതിയ വകഭേദത്തെ കണ്ടെത്തിയത്. ബി1.1.529 എന്നാണ് ഈ വൈറസ് വകഭേദത്തിന്റെ പേര്. ബോട്‌സ് വാനയില്‍ മൂന്നും ദക്ഷിണാഫ്രിക്കയില്‍ ആറും ഹോങ്കോങില്‍ ഒന്നും കേസുകളാണ് റിപ്പോര്‍ട്ട് ചെയ്തത്. എന്നാല്‍ ഇന്ത്യ ഇതുവരെയും ദക്ഷിണാഫ്രിക്കയില്‍ നിന്നുള്ള വിമാനങ്ങള്‍ക്ക് വിലക്കേര്‍പ്പെടുത്തിയിട്ടില്ല. 

ഉയര്‍ത്ത അളവില്‍ മ്യൂട്ടേഷന്‍ സംഭവിച്ചിട്ടുള്ള വകഭേദമായതിനാല്‍ പൊതുജനാരോഗ്യത്തിന് വന്‍ ഭീഷണിയാണിതെന്ന് കേന്ദ്ര ആരോഗ്യ സെക്രട്ടറി രാജേഷ് ഭൂഷണ്‍ വെള്ളിയാഴ്ച അറിയിച്ചു.  

ശരീരത്തിന്റെ പ്രതിരോധ ശേഷിയെ വെട്ടിച്ച് കടക്കാനുള്ള അതിതീവ്രശേഷി ബി.1.1.529 എന്ന വൈറസ് വകഭേദത്തിനുണ്ടെന്ന് മാത്രമല്ല എളുപ്പം പടര്‍ന്നുപിടിക്കാനും ശേഷിയുണ്ടെന്ന് ജോഹന്നാസ് ബര്‍ഗില്‍ നിന്നും റോയിട്ടേഴ്‌സ് റിപ്പോര്‍ട്ട് ചെയ്യുന്നു.  

ഈ വകഭേദത്തിന് എളുപ്പം പടര്‍ന്നുപിടിക്കാനുള്ള ശേഷിയുണ്ട്. ആരോഗ്യരക്ഷാസംവിധാനത്തില്‍ അടുത്ത ഏതാനും നാളുകളിലും ആഴ്ചകളിലും വലിയ സമ്മര്‍ദ്ദമുണ്ടാക്കാന്‍ ഈ വൈറസ് വകഭേദത്തിന് ശേഷിയുണ്ടെന്ന് ദക്ഷിണാഫ്രിക്കയിലെ വൈറോളജിസ്റ്റ് ടുലിയോ ഡെ ഒലിവെയ്‌റ പറഞ്ഞു. ആരോഗ്യവിദഗ്ധര്‍ ബി.1.1.529 വകഭേദത്തെക്കുറിച്ച് അപായമണി മുഴക്കിയതോടെ കൂടുതല്‍ രാജ്യങ്ങള്‍ യാത്രാനിരോധനം ഏര്‍പ്പെടുത്തി രോഗം പകരുന്നത് തടയാന്‍ മുന്‍കയ്യെടുക്കുകയാണ്.

ബ്രിട്ടന്‍ ദക്ഷിണാഫ്രിക്കയുള്‍പ്പെടെ ഏതാനും രാജ്യങ്ങളില്‍ നിന്നുള്ള വിമാനം റദ്ദാക്കിയിരിക്കുകയാണ്. നമീബിയ, ലെസോതോ, എസ്വാടിനി, സിംബാബ്വേ, ബോട്‌സ്വാന എന്നീ രാഷ്‌ട്രങ്ങളില്‍ നിന്നുള്ള വിമാനങ്ങള്‍ റദ്ദാക്കിയിട്ടുണ്ട്.

ജര്‍മ്മനിയുടെ ആരോഗ്യമന്ത്രി ജെന്‍സ് സ്പാനും ദക്ഷിണാഫ്രിക്കയില്‍ നിന്നുള്ള വിമാനങ്ങള്‍ക്ക് വിലക്കേര്‍പ്പെടുത്തി. ഈ രാജ്യങ്ങളില്‍ നിന്നും ജര്‍മ്മന്‍ പൗരന്മാര്‍ക്ക് പ്രവേശനം നല്‍കുമെങ്കിലും രണ്ട് വാക്‌സിനെടുത്തവരാണെങ്കിലും നിര്‍ബന്ധമായും ക്വാറന്‍റൈനില്‍ ഇരിയ്‌ക്കണം.

ദക്ഷിണാഫ്രിക്കയില്‍ ഉണ്ടായിരുന്നവര്‍ക്ക് പ്രവേശനം നല്‍കില്ലെന്ന് ഇറ്റലി അറിയിച്ചു. ലെസോതൊ, ബോട്‌സ്വാന, സിംബാബ്വേ, മൊസാമ്പിക്, നമീബിയ, സ്വാസിലാന്റ് എന്നിവിടങ്ങളില്‍ നിന്നുള്ളവര്‍ക്കും വിലക്കേര്‍പ്പെടുത്തി. ഫ്രാന്‍സും ദക്ഷിണാഫ്രിക്കയില്‍ നിന്നുള്ള യാത്രക്കാര്‍ക്ക് വിലക്കേര്‍പ്പെടുത്തിയിട്ടുണ്ട്.