മുംബൈ: അഹമ്മദാബാദ്, ലഖ്‌നൗ എന്നിങ്ങനെ പുതിയ രണ്ട് ടീമുകള്‍ ഐപിഎല്ലിന്റെ ഭാഗമാകുന്നതോടെ ഐപിഎല്ലിന്റെ അടുത്ത സീസണില്‍ താരങ്ങളുടെ ടീമുകളില്‍ വലിയ മാറ്റങ്ങള്‍ക്ക് സാധ്യതയെന്ന് റിപ്പോര്‍ട്ട്. ഇതില്‍ ഏറ്റവും പ്രധാനം മലയാളി താരം സഞ്ജു സാംസണിന്റെ ടീം മാറ്റമാണ്. രാജസ്ഥാന്‍ റോയല്‍സ് ക്യാപ്റ്റനായ സഞ്ജു അടുത്ത സീസണില്‍ ചെന്നൈക്ക് വേണ്ടി കളിക്കുമെന്നാണ് റിപ്പോര്‍ട്ട്.
രാജസ്ഥാന്റെ സൂപ്പര്‍ താരമായിരുന്ന സഞ്ജു കഴിഞ്ഞ ദിവസം ഇന്‍സ്റ്റഗ്രാമില്‍ രാജസ്ഥാന്‍ റോയല്‍സിനെ അണ്‍ഫോളോ ചെയ്തിരുന്നു. പിന്നാലെ ചെന്നൈയെ ഫോളോ ചെയ്യുകയും ചെയ്തു. ഇതോടെയാണ് താരം ചെന്നൈയിലേക്കു കൂടുമാറുന്നതായുള്ള ചര്‍ച്ചകള്‍ സജീവമായത്. നായകന്‍ എംഎസ് ധോണിക്ക് ശേഷം മികച്ചൊരു വിക്കറ്റ് കീപ്പറെ ചെന്നൈ തിരയുന്നുണ്ട്. ഇതോടൊപ്പം ധോണിക്കു ശേഷം നായകന്‍ എന്ന രീതിയിലും സഞ്ജുവില്‍ ഭാവി കാണുന്നവരുമുണ്ട്. ടീമുകള്‍ തമ്മില്‍ താരങ്ങളെ വച്ചുമാറാനുള്ള ട്രാന്‍സ്ഫര്‍ വിന്‍ഡോ അടുത്ത മാസം ആരംഭിക്കുമെന്നാണ് അറിയുന്നത്. ഇതിന്റെ മുന്നോടിയായി ടീമുകള്‍ തമ്മില്‍ ചര്‍ച്ചകള്‍ ആരംഭിച്ചുകഴിഞ്ഞിട്ടുണ്ട്. മെഗാ ലേലമാണ് അടുത്ത സീസണിലേക്ക് നടക്കുന്നത്.
അതേസമയം, മുംബൈ ഇന്ത്യന്‍സും ചില വലിയ താരങ്ങളെ സ്വന്തമാക്കാനുള്ള നീക്കത്തിലാണ്. കെഎല്‍ രാഹുലിനെയും ബെന്‍ സ്റ്റോക്‌സിനെയുമാണ് മുംബൈ ലക്ഷ്യമിടുന്നത്. സഞ്ജുവിനു പകരം ആസ്‌ട്രേലിയന്‍ പേസര്‍ ജോഷ് ഹേസല്‍വുഡിനെയാണ് രാജസ്ഥാന്‍ നോട്ടമിടുന്നതെന്നാണ് സൂചന.
പ്രതികരിക്കാൻ ഇവിടെ എഴുതുക: