ദുരിത കാലത്തും കര്‍ഷകരെ കൈവിട്ട് സംസ്ഥാന സര്‍ക്കാര്‍; നെല്ലിന്റെ താങ്ങുവില കുറച്ചു; ഇപ്പോള്‍ നെല്ലെടുക്കുന്നത് വെറും 28 രൂപയ്‌ക്ക്

പാലക്കാട്: നെല്ലിന്റെ താങ്ങുവില സംബന്ധിച്ച സംസ്ഥാന സര്‍ക്കാറിന്റെ പ്രഖ്യാപനം പാഴ് വാക്കായി. ഇത്തവണ 28.72 രൂപയ്‌ക്ക് നെല്ല് സംഭരിക്കുമെന്നായിരുന്നു സര്‍ക്കാര്‍ പ്രഖ്യാപിച്ചിരുന്നത്. എന്നാല്‍ സംഭരണ വില സംബന്ധിച്ച് സര്‍ക്കാര്‍ ഇപ്പോള്‍ ഇറക്കിയ ഉത്തരവില്‍ 28 രൂപ മാത്രമാണ് താങ്ങു വില.  

പാലക്കാട് കളക്ടറേറ്റില്‍ നെല്ല് സംഭരണത്തിന് മുന്നോടിയായി വിളിച്ച യോഗത്തിന് ശേഷം മന്ത്രി നടത്തിയ പ്രഖ്യാപനത്തിലാണ് ഇത്തവണ 28 രൂപ 72 പൈസയ്‌ക്ക് നെല്ല് സംഭരിക്കുമെന്ന് ഉറപ്പു നല്‍കിയിരുന്നത്. പാലക്കാട് ജില്ലയില്‍ ഇരുപത് ശതമാനത്തിലേറെ നെല്ലു സംഭരിച്ച ശേഷം ഇപ്പോള്‍ വന്ന ഈ ഉത്തരവില്‍ പക്ഷെ ഇത് ലംഘിക്കപ്പെട്ടു. 72 പൈസ കുറച്ച് 28 രൂപയ്‌ക്ക്ാണ് ഇപ്പോള്‍ നെല്ല് സംഭരിക്കുന്നത്.

കഴിഞ്ഞ വര്‍ഷം 27.48 രൂപയ്‌ക്ക്ായിരുന്നു നെല്ല് സംഭരിച്ചിരുന്നത്. ഇതില്‍ 18.68 രൂപ കേന്ദ്ര വിഹിതവും 8.80 രൂപ സംസ്ഥാന വിഹിതവുമാണ്. ഇതിനിടെ കഴിഞ്ഞ ബജറ്റില്‍ 52 പൈസ വര്‍ദ്ധിപ്പിച്ച് സംസ്ഥാന സര്‍ക്കാര്‍ സംഭരണ വില 28 രൂപയാക്കി. എന്നാല്‍ കേന്ദ്ര സര്‍ക്കാര്‍ താങ്ങു വില 72 പൈസ കൂടി വര്‍ദ്ധിപ്പിച്ചതോടെ 28.72 രൂപയ്‌ക്ക് നെല്ല് സംഭരിക്കുമെന്ന് സര്‍ക്കാര്‍ പ്രഖ്യാപിച്ചു. ഈ പ്രഖ്യാപനമാണ് ഇപ്പോള്‍ പാഴ് വാക്കായിരിക്കുന്നത്.