അമ്പലപ്പുഴ: യുവതിയെ വീട്ടില്‍ മരിച്ച നിലയില്‍ കണ്ട സംഭവം കൊലപാതകം, ഭര്‍ത്താവ് അറസ്റ്റില്‍. കൊട്ടാരക്കര പള്ളിക്കല്‍ പുത്തന്‍ വീട്ടില്‍ സുനിലി (40) നെയാണ് അമ്പലപ്പുഴ പോലീസ് അറസ്റ്റ് ചെയ്തത്. ഒപ്പം താമസിച്ചിരുന്ന കൈനോട്ടക്കാരിയായ മോളമ്മയാണ് മരിച്ചത്.
ഇരുവരുടെയും രണ്ടാം വിവാഹമായിരുന്നു. മൂന്നു മാസം മുന്‍പാണ് ഇവര്‍ തോട്ടപ്പള്ളിയില്‍ താല്‍ക്കാലിക താമസമാരംഭിച്ചത്. തിങ്കളാഴ്ച ഉച്ചയോടെ യുവതി വീട്ടില്‍ കുഴഞ്ഞു വീണിരുന്നു. പിന്നീട് മെഡിക്കല്‍ കോളേജാശുപത്രിയിലെത്തിച്ചെങ്കിലും മരണം സ്ഥിരീകരിച്ചു.
സുനിലും യുവതിയുമായി വഴക്കുണ്ടായിരുന്നതായി പരിസര വാസികള്‍ പറഞ്ഞിരുന്നു. തുടര്‍ന്ന് സുനില്‍ പോലീസ് നിരീക്ഷണത്തിലായിരുന്നു. ഇന്നലെ മെഡിക്കല്‍ കോളേജാശുപത്രി മോര്‍ച്ചറിയില്‍ നടത്തിയ പോസ്റ്റുമോര്‍ട്ടത്തില്‍ യുവതിയുടെ തലക്കും വയറിനും പരിക്കേറ്റതായി കണ്ടു. തുടര്‍ന്ന് നടത്തിയ ചോദ്യം ചെയ്യലിലാണ് താന്‍ യുവതിയെ മര്‍ദിച്ചതായി സുനില്‍ പോലീസിനോട് സമ്മതിച്ചത്. സുനിലിനെ വിശദമായി ചോദ്യം ചെയ്തു വരികയാണെന്ന് പോലീസ് പറഞ്ഞു.
പ്രതികരിക്കാൻ ഇവിടെ എഴുതുക: