ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ ചെല്‍സിക്ക് തകര്‍പ്പന്‍ ജയം. സതാംപ്റ്റണിനെ തോല്‍പ്പിച്ചത് ഒന്നിനെതിരെ മൂന്ന് ഗോളുകള്‍ക്ക്. ട്രവോ ചലോബ ഒമ്പതാം മിനിറ്റില്‍ ഗോള്‍ നേടി. 69-ാം മിനിറ്റില്‍ പെനാല്‍റ്റിയിലൂടെ ജെയിംസ് വാര്‍ഡ് പ്രൗസ് സതാംപ്റ്റണിനെ സമനിലയിലെത്തിച്ചെങ്കിലും അവസാന മിനിറ്റുകളില്‍ ചെല്‍സി വിജയിച്ചു. ടിമോ വെര്‍ണര്‍ 84-ാം മിനിറ്റിലും ബെന്‍ ചില്‍വെല്‍ 89-ാം മിനിറ്റിലും ഗോള്‍ നേടി.
മറ്റ് മത്സരങ്ങളില്‍ മാഞ്ചസ്റ്റര്‍ യുണൈറ്റഡ് സമനിലയില്‍ കുടുങ്ങി. എവര്‍ട്ടണ്‍ ഒരു ഗോളിന് സമനിലയില്‍ പിടിച്ചു. 43-ാം മിനിറ്റില്‍ ആന്റണി മാര്‍ഷ്യല്‍ യുണൈറ്റഡിനെ മുന്നിലെത്തിച്ചു. 65-ാം മിനിറ്റില്‍ ആന്‍ഡ്രോസ് ടൗണ്‍സെന്‍ഡ് എവര്‍ട്ടന് സമനില നല്‍കി. കളിയില്‍ യുണൈറ്റഡ് ആധിപത്യം പുലര്‍ത്തിയെങ്കിലും വിജയിക്കാനായില്ല. ആഴ്‌സണലിനെ ബ്രൈറ്റണ്‍ സമനിലയില്‍ പിടിച്ചു. മികച്ച പ്രകടനം നടത്തിയ ബ്രൈറ്റണ്‍ ആഴ്‌സണലിനെ ഗോള്‍രഹിത സമനിലയില്‍ കുടുക്കി.
പ്രതികരിക്കാൻ ഇവിടെ എഴുതുക: