ആലപ്പുഴ: 2019-20 വര്‍ഷത്തെ എ.എം. ആരീഫ് എംപിയുടെ പ്രാദേശിക വികസന ഫണ്ടില്‍ നിന്നും വിനിയോഗിച്ചത് 68.13 ശതമാനം മാത്രം. എംപി ഫണ്ട് വിനിയോഗം വിലയിരുത്താനായി ചേര്‍ന്ന യോഗത്തിലാണ് കണക്കുകള്‍ അവലോകനം ചെയ്തത്.എംപിയുടെ പ്രാദേശിക വികസന ഫണ്ടില്‍ ഉള്‍പ്പെടുത്തി ഏറ്റെടുത്ത 18 പ്രവര്‍ത്തികളില്‍ എട്ടെണ്ണമാണ് പൂര്‍ത്തീകരിച്ചത്. എസ്റ്റിമേറ്റ് എടുക്കുന്നതിലടക്കമുള്ള കാലതാമസങ്ങള്‍ കാരണം പ്രവര്‍ത്തികളുടെ പുരോഗതിക്ക്‌വേഗത കുറയുന്നു. പരിഹരിക്കാന്‍ പറ്റുന്ന സാങ്കേതിക പ്രശ്‌നങ്ങള്‍ വേഗത്തില്‍ പരിഹരിച്ച് ഏറ്റെടുക്കുന്ന ജോലികള്‍ കൃത്യതയോടെ വേഗത്തില്‍ പൂര്‍ത്തീകരിക്കാന്‍ എല്ലാവരും ശ്രമിക്കണമെന്ന് എംപി പറഞ്ഞു.
കൊവിഡ് പ്രത്യേക പ്രോജക്ടുകള്‍ക്ക് പ്രാധാന്യം നല്‍കി കായംകുളം താലൂക്ക് ആശുപത്രിക്കായി രണ്ട് പോര്‍ട്ടബിള്‍ വെന്റിലേറ്റര്‍, വണ്ടാനം മെഡിക്കല്‍ കോളേജിനായി മൂന്ന് പോര്‍ട്ടബിള്‍ വെന്റിലേറ്റര്‍ എന്നിവ നല്‍കിയിട്ടുണ്ട്. ദേശീയ വൈറോളജി ഇന്‍സ്റ്റിറ്റ്യൂട്ടിനായി 20 ലക്ഷം രൂപ ചെലവില്‍ ആര്‍ടിപിസിആര്‍ പരിശോധന സംവിധാനവും ഒരുക്കി. മൂന്ന് റോഡ് നിര്‍മ്മാണ പദ്ധതികള്‍, പട്ടണക്കാട് മിനി മാസ്സ് ലൈറ്റ് അനുവദിച്ചതുമടക്കമുള്ള വികസന പദ്ധതികളും നടത്തി. മറ്റുള്ള പദ്ധതികളുടെ പുരോഗതിയും യോഗം വിലയിരുത്തി.
പട്ടികജാതി വിഭാഗത്തിനായുള്ള ആറ് പദ്ധതികള്‍ക്കായി 96.11 ലക്ഷം രൂപയാണ് എംപി ഫണ്ടില്‍ നിന്നും നീക്കിവച്ചത്. വിവിധ ബ്ലോക്ക് പരിധിയിലെ ആരോഗ്യ കേന്ദ്രങ്ങള്‍ക്കായി ഏഴ് ആംബുലന്‍സും പാലിയേറ്റീവ് കെയറിനായി ഒരു ആംബുലന്‍സും എംപി ഫണ്ടില്‍ നിന്നും പുതിയ പദ്ധതി എന്ന രീതിയില്‍ അനുവദിച്ചു. നാല് റെയില്‍വേ സ്റ്റേഷനുകളിലേക്കുള്ള റോഡ് നിര്‍മ്മാണത്തിനായും തുക അനുവദിച്ചിട്ടുണ്ട്. ആലപ്പുഴ (40 ലക്ഷം), മാരാരിക്കുളം (15 ലക്ഷം), ഹരിപ്പാട് (10 ലക്ഷം), അമ്പലപ്പുഴ (10 ലക്ഷം) എന്നിങ്ങനെയാണ് റെയില്‍വേ സ്റ്റേഷന്‍ റോഡുകളുടെ നിര്‍മ്മാണത്തിനായി അനുവദിച്ചത്.
പ്രതികരിക്കാൻ ഇവിടെ എഴുതുക: