ലീഡ്‌സ്: ഇംഗ്ലീഷ് പേസര്‍ ഒലി റോബിന്‍സണ്‍ ഉയര്‍ത്തിവിട്ട കൊടുങ്കാറ്റില്‍ ഇന്ത്യയുടെ പേരുകേട്ട ബാറ്റിങ്‌നിര ആടിയുലഞ്ഞ് തകര്‍ന്നുവീണു. ഇതോടെ ഇന്ത്യ മൂന്നാം ടെസ്റ്റില്‍ ഇന്നിങ്‌സിനും 76 റണ്‍സിനും തോറ്റു. ആദ്യ ഇന്നിങ്‌സില്‍ 354 റണ്‍സ് ലീഡ് വഴങ്ങിയ ഇന്ത്യ നാലാം ദിനത്തില്‍ 278 റണ്‍സിന് ഓള്‍ ഔട്ടായി. ഇന്ത്യയുടെ അഞ്ചു വിക്കറ്റ് പിഴുതെടുത്ത ഒലി റോബിന്‍സണാണ് കളിയിലെ കേമന്‍. സ്‌കോര്‍: ഇന്ത്യ 78, 278, ഇംഗ്ലണ്ട 432.
ഈ വിജയത്തോടെ ഇംഗ്ലണ്ട് പരമ്പരയില്‍ ഇന്ത്യക്കൊപ്പം (1-1) എത്തി. ലോര്‍ഡ്‌സിലെ രണ്ടാം ടെസ്റ്റില്‍ ഇന്ത്യ വിജയം നേടിയിരുന്നു. ഇനി രണ്ട് ടെസ്റ്റുകള്‍ കൂടി ശേഷിക്കുന്നുണ്ട്. നാലാം ടെസ്റ്റ് സെപ്തംബര്‍ രണ്ടിന് ഓവലില്‍ ആരംഭിക്കും.
രണ്ടിന് 215 റണ്‍സെന്ന സ്‌കോറിന് ഇന്നലെ ഇന്നിങ്‌സ് പുനരാരംഭിച്ച ഇന്ത്യക്ക് തുടക്കത്തിലെ തിരിച്ചടിയേറ്റു. 91 റണ്‍സുമായി മൂന്നാം ദിനത്തില്‍ പുറത്താകാതെ നിന്ന ചേതേശ്വര്‍ പൂജാര അതേ സ്‌കോറിന് തന്നെ പുറത്തായി. റോബിന്‍സണിന്റെ പന്തില്‍ വിക്കറ്റിന് മുന്നില്‍ കുടുങ്ങി. 189 പന്ത് നേരിട്ട പൂജാര പതിനഞ്ച് ബൗണ്ടറികളുടെ പിന്‍ബലത്തിലാണ് 91 റണ്‍സ് നേടിയത്.
പൂജാര മടങ്ങിയതോടെ ഇന്ത്യയുടെ ബാറ്റിങ്‌നിര ചീട്ടുകൊട്ടാരം പോലെ തകര്‍ന്നുവീണു. കഴിഞ്ഞ ദിവസം 47 റണ്‍സുമായി കീഴടങ്ങാതെ നിന്ന ഇന്ത്യന്‍ ക്യാപ്റ്റന്‍ വിരാട് കോഹ്‌ലി അര്‍ധ സെഞ്ചുറി കുറിച്ച് കളം വിട്ടു. റോബിന്‍സണാണ് കോഹ് ലിയെ കൂടാരം കയറ്റിയത്. ക്യാപ്റ്റന്‍ ജോ റൂട്ട് ക്യാച്ചെടുത്തു. 125 പന്ത് നേരിട്ട് കോഹ്‌ലി എട്ട്് ബൗണ്ടറികളുടെ മികവില്‍ 55 റണ്‍സ് എടുത്തു.
പിന്നീട് രവീന്ദ്ര ജഡേജമാത്രാണ് അല്‍പ്പമെങ്കിലും ചെറുത്ത് നിന്നത്. അടിച്ചുകളിച്ച ജഡേജ 25 പന്തില്‍ അഞ്ചു ഫോറും ഒരു സിക്‌സറും സഹിതം 30 റണ്‍സ് നേടിയാണ് ക്രീസ് വിട്ടത്. ഓവര്‍ടണിന്റെ പന്തില്‍ ബട്‌ലര്‍ ജഡേയെ പിടികൂടി. ജഡേജ്ക്ക് ശേഷമെത്തിയ മുഹമ്മദ് സിറാജിനെ സംപൂജ്യനാക്കി മടക്കി ഓവര്‍ടണ്‍ ഇംഗ്ലണ്ടിന് വിജയം സമ്മാനിച്ചു.
ഇംഗ്ലീഷ് പേസര്‍ ഒലി റോബിന്‍സണ്‍ 65 റണ്‍സിന് അഞ്ചു വിക്കറ്റ് വീഴ്‌ത്തി. ക്രെയ്ഗ് ഓവര്‍ടണ്‍ 47 റണ്‍സിന് മൂന്ന് വിക്കറ്റ്് നേടി. ജെയിംസ് ആന്‍ഡേഴ്‌സണും മൊയിന്‍ അലിക്കും ഓരോ വിക്കറ്റ് ലഭിച്ചു.
സ്‌കോര്‍ബോര്‍ഡ്
ഇന്ത്യ: ഒന്നാം ഇന്നിങ്‌സ് 78, ഇംഗ്ലണ്ട്് : ഒന്നാം ഇന്നിങ്‌സ് 432, ഇന്ത്യ രണ്ടാം ഇന്നിങ്‌സ്: രോഹിത് ശര്‍മ എല്‍ബിഡബ്ല്യു ബി റോബിന്‍സണ്‍ 59, കെ.എല്‍. രാഹുല്‍ സി ബെയര്‍സ്‌റ്റോ ബി ഓവര്‍ടണ്‍ 8, ചേതേശ്വര്‍ പൂജാര എല്‍ബിഡബ്ല്യു ബി റോബിന്‍സണ്‍ 91, വിരാട് കോഹ്‌ലി സി റൂട്ട്് ബി റോബിന്‍സണ്‍ 55, അജിങ്ക്യ രഹാനെ സി ബട്‌ലര്‍ ബി ആന്‍ഡേഴ്‌സണ്‍ 10, ഋഷഭ് പന്ത് സി ഓവര്‍ടണ്‍ ബി റോബിന്‍സണ്‍ 1, രവീന്ദ്ര ജഡേജ സി ബട്‌ലര്‍ ബി ഓവര്‍ടണ്‍ 30, മുഹമ്മദ് ഷമി ബി അലി 6, ഇഷാന്ത് ശര്‍മ്മ സി ബട്‌ലര്‍ ബി റോബിന്‍സണ്‍ 2, ജസ്പ്രീത് ബുംറ നോട്ടൗട്ട് 1, മുഹമ്മദ് സിറാജ് സി ബെയര്‍സ്‌റ്റോ ബി ഓവര്‍ടണ്‍ 0, എക്‌സ്ട്രാസ് 15, ആകെ 278.
വിക്കറ്റ് വീഴ്ച: 1-34, 2-116, 3-215, 4-237, 5-239, 6-239, 7-254, 8-257, 9-278, 10-278.
ബൗളിങ്: ജെയിംസ് ആന്‍ഡേഴ്‌സണ്‍ 26-11-63-1, ഒലി റോബിന്‍സണ്‍ 26-6-65-5, ക്രെയ്ഗ് ഓവര്‍ടണ്‍ 18.3-6-47-3, സാം കറണ്‍: 9-1-40-0, മൊയിന്‍ അലി 14-1-40-1, ജോ റൂട്ട് 6-1-15-0.
പ്രതികരിക്കാൻ ഇവിടെ എഴുതുക: