അമ്പലപ്പുഴ: ആശുപത്രി അവശിഷ്ടങ്ങള്‍ പുറക്കാട് കടല്‍തീരത്തെ ജനവാസ മേഖലയില്‍ ഉപേക്ഷിക്കപ്പെട്ട നിലയില്‍. ഇന്നലെ രാവിലെയാണ് പുറക്കാട് കാവില്‍ ശിവക്ഷേത്രത്തിന് പടിഞ്ഞാറ് ഭാഗത്തെ കടല്‍ തീരത്ത് വ്യാപകമായി ആശുപത്രി മാലിന്യങ്ങള്‍ കാണപ്പെട്ടത്. കടല്‍ക്ഷോഭത്തെ പ്രതിരോധിക്കാന്‍ നിര്‍മ്മിച്ചിരിക്കുന്ന പുലിമുട്ടുകളോട് ചേര്‍ന്നാണ് മാലിന്യങ്ങള്‍ തള്ളിയിരിക്കുന്നത്.
ഗ്ലൂക്കോസ് ട്യൂബുകള്‍, ഇന്‍ജക്ഷന്‍ സിറിഞ്ചുകള്‍, പ്ലാസ്റ്റിക് വേസ്റ്റ്, പഞ്ഞി തുടങ്ങിയവയാണ് മാലിന്യത്തില്‍ ഏറെയും. രാത്രിയില്‍ വാഹനത്തില്‍ എത്തിച്ചതായിരിക്കുമെന്ന് നാട്ടുകാര്‍ പറയുന്നു. നൂറു കണക്കിന് കുടുംബങ്ങള്‍ തിങ്ങി പാര്‍ക്കുന്ന പ്രദേശമാണിത്. കോവിഡ് ഭീഷണിയും, പകര്‍ച്ച പനികളും ഭീഷണിയായിരിക്കെ ഇത്തരത്തില്‍ മാലിന്യങ്ങള്‍ നിക്ഷേപിക്കാന്‍ കടല്‍ തീരം തെരഞ്ഞെടുത്തതില്‍ ദുരൂഹതയുണ്ടന്ന് നാട്ടുകാര്‍ ചൂണ്ടി കാട്ടുന്നു. അമ്പലപ്പുഴ ഭാഗത്തെ ഒരു സ്വകാര്യ ആശുപത്രിയില്‍ നിന്ന് പുറന്തള്ളിയ മാലിന്യങ്ങളാണന്നും ആരോപണമുണ്ട്.
പ്രതികരിക്കാൻ ഇവിടെ എഴുതുക: