ന്യൂദല്‍ഹി : കേരളത്തിലെ ആരോഗ്യ പ്രവര്‍ത്തകര്‍ക്ക് അഭിനന്ദനവുമായി പ്രധാനമന്ത്രി നരേന്ദ്രമോദി. സംസ്ഥാനത്തിന് നല്‍കിയ വാക്‌സിന്‍ ഒരു തുള്ളിപോലും പാഴാക്കാതെ ഉപയോഗിക്കാനായത് വളരെ മികച്ച കാര്യമാണെന്നും പ്രധാനമന്ത്രി അറിയിച്ചു. സംസ്ഥാനത്തിന് കിട്ടിയ വാക്‌സീന്‍ പാഴാക്കാതെ ഉപയോഗിച്ചുവെന്ന മുഖ്യമന്ത്രിയുടെ ട്വീറ്റ് ചൂണ്ടിക്കാട്ടിയാണ് പ്രധാനമന്ത്രി അഭിനന്ദിച്ചിരിക്കുന്നത്.
കേന്ദ്രം നല്‍കിയ വാക്‌സീനിലെ ഒരു തുള്ളി പോലും പാഴാക്കാതെ എങ്ങിനെ ഉപയോഗപ്പെടുത്താമെന്നതിന് സംസ്ഥാനത്തെ നേഴ്‌സുമാരും ആരോഗ്യ പ്രവര്‍ത്തകരും മികച്ച ഉദാഹരണമാണ്. വാക്‌സിന്‍ വേസ്റ്റേജ് കുറയ്‌ക്കുന്നത് കോവിഡ് പ്രതിരോധത്തിന് ശക്തിപകരുന്ന ഒന്ന് കൂടിയാണെന്നും പ്രധാനമന്ത്രി ട്വിറ്ററിലൂടെ അറിയിച്ചു.
73,38,806 ഡോസ് വാക്‌സിനാണ് കേന്ദ്ര സര്‍ക്കാര്‍ കേരളത്തിന് നല്‍കിയത്. എന്നാല്‍ വേസ്റ്റേജ് ഫാക്ടറും കൂടി ഉപയോഗപ്പെടുത്തി 74,26,164 ഡോസ് ഇതുവരെ നല്‍കിയിട്ടുണ്ട്. ലഭിച്ച മുഴുവന്‍ വാക്‌സിനും ഉപയോഗപ്പെടുത്തിയ സംസ്ഥാനത്തെ നേഴ്‌സുമാരും ആരോഗ്യ പ്രവര്‍ത്തകരും ഹൃദയം നിറഞ്ഞ അഭിനന്ദനം അര്‍ഹിക്കുന്നുവെന്നാണ് മുഖ്യമന്ത്രി പിണറായി വിജയന്‍ കഴിഞ്ഞ ദിവസം ട്വീറ്റ് ചെയ്തത്.
പ്രതികരിക്കാൻ ഇവിടെ എഴുതുക: