കോട്ടയം: കോവിഡ് പ്രതിരോധ നടപടികളുടെ ഭാഗമായി കോട്ടയം കോടിമതയിലെ ജില്ലാ മൃഗാശുപത്രിയില്‍ ഇന്ന് മുതല്‍ നിയന്ത്രണം ഏര്‍പ്പെടുത്തി. ചികിത്സയ്‌ക്കായി കൊണ്ടുവരുന്ന മൃഗങ്ങള്‍ക്കൊപ്പം ഒരാള്‍ക്കു മാത്രമേ ആശുപത്രിയിലേക്ക് പ്രവേശനം അനുവദിക്കൂ.
ഔദ്യോഗിക വാഹനങ്ങള്‍ ഒഴികെയുള്ളവയ്‌ക്ക് ആശുപത്രി വളപ്പില്‍ പാര്‍ക്കിംഗ് അനുവദിക്കില്ല. നായക്കള്‍ക്കും പൂച്ചകള്‍ക്കുമുള്ള പ്രതിരോധ വാക്‌സിനേഷന്‍ ഒരു മാസത്തേക്ക് ഉണ്ടായിരിക്കില്ല. അടിയന്തര ചികിത്സകള്‍ക്കും ശസ്തക്രിയകള്‍ക്കുമുള്ള സൗകര്യം രാവിലെ എട്ടു മുതല്‍ രാത്രി എട്ടു വരെ ഉണ്ടായിരിക്കും.
ജില്ലയിലെ എല്ലാ പഞ്ചായത്തുകളിലും മുനിസിപ്പാലിറ്റികളിലും മൃഗസംരക്ഷണ വകുപ്പിന്റെ കീഴില്‍ പ്രവര്‍ത്തിക്കുന്ന മൃഗാശുപത്രികളുണ്ട്. അതത് സ്ഥലങ്ങളിലുള്ളവര്‍ ഈ കേന്ദ്രങ്ങളിലെ സൗകര്യങ്ങള്‍ പ്രയോജനപ്പെടുത്തണം. അവിടെനിന്നും വിദഗ്ധ ചികിത്സയ്‌ക്ക് നിര്‍ദ്ദേശിക്കുമ്പോള്‍ മാത്രം ജില്ലാ വെറ്ററിനറി കേന്ദ്രത്തില്‍ മൃഗങ്ങളെ കൊണ്ടുവന്നാല്‍ മതിയാകുമെന്നും ചീഫ് വെറ്ററിനറി ഓഫീസര്‍ ഡോ. ഷാജി പണിക്കശ്ശേരി അറിയിച്ചു.
പ്രതികരിക്കാൻ ഇവിടെ എഴുതുക: