ഒരിടവേളക്കു ശേഷം തെന്നിന്ത്യന്‍ ലേഡി സൂപ്പര്‍സ്റ്റാര്‍ നയന്‍താരയും മലയാളത്തിന്റെ ചോക്ലേറ്റ് നായകന്‍ കുഞ്ചാക്കോ ബോബനും ആദ്യമായി ഒന്നിക്കുന്ന ‘നിഴല്‍’ ഏപ്രില്‍ 4ന് ഈസ്റ്റര്‍ റിലീസായി തിയേറ്ററുകളിലെത്താന്‍ ഒരുങ്ങുകയാണ്. രാജ്യാന്തര പുരസ്‌കാരങ്ങളും സംസ്ഥാന പുരസ്‌കാരവും നേടിയ ചിത്രസംയോജകന്‍ അപ്പു എന്‍. ഭട്ടതിരി ആദ്യമായി സംവിധാനം ചെയ്യുന്ന ചിത്രമാണ് ‘നിഴല്‍’.
- നിഗൂഢതകള്‍ ഒളിപ്പിച്ച് ടൈറ്റില്‍
സിനിമയുടെ പേര് തന്നെയാണ് അതിന്റെ പ്രധാന ആകര്‍ഷണം – നിഴല്‍. കേള്‍ക്കുന്ന മാത്രയില്‍ ചില ദുരൂഹതകളൊക്കെ തോന്നുന്നപോലെ, ചിത്രത്തിന്റെ കഥയോട് ചേര്‍ത്തുനിര്‍ത്തുമ്പോള്‍ ടൈറ്റില്‍ അര്‍ത്ഥപൂര്‍ണ്ണമാവുകയാണ്. പേര് സൂചിപ്പിക്കുന്നത് പോലെ ‘നിഴല്‍’ ഒരു ത്രില്ലറാണ്, ഒപ്പം നിഗൂഢതയും. അതുകൊണ്ട് തന്നെയാണ് ചിത്രത്തിന്റെ പേരില്‍ തൊട്ട് ടൈറ്റില്‍ പോസ്റ്റര്‍, ഫസ്റ്റ് ലുക്ക് എല്ലാത്തിലും കുറച്ച് നിഗൂഢത അണിയറ പ്രവര്‍ത്തകര്‍ ഒളിപ്പിച്ചിരിക്കുന്നത്.
- ചാക്കോച്ചനും നയന്‍സും ചേര്‍ന്ന കോമ്പോ
ചാക്കോച്ചനും നയന്‍താരയും ഒന്നിക്കുന്ന ആദ്യ ചിത്രം. അത് തന്നെയാണ് പ്രേക്ഷകരുടെ ആകാംക്ഷയും. ചിത്രത്തില്‍ ഫസ്റ്റ് ക്ലാസ് ജുഡീഷ്യല്‍ മജിസ്‌ട്രേറ്റ് ജോണ്‍ ബേബി എന്ന കഥാപാത്രമായി കുഞ്ചാക്കോ ബോബന്‍ എത്തുമ്പോള്‍ ഷര്‍മിളയായി നയന്‍സും ക്യാമറയ്‌ക്ക് മുന്നിലെത്തുന്നു.
കുഞ്ചാക്കോ ബോബന്‍, നയന്‍താര എന്നിവരെ കൂടാതെ മാസ്റ്റര്‍ ഐസിന്‍ ഹാഷ്, സൈജു കുറുപ്പ്, വിനോദ് കോവൂര്‍, ഡോ.റോണി, സിയാദ് യദു, അനീഷ് ഗോപാല്‍, സാദിക്ക്, ദിവ്യപ്രഭ, ആദ്യ പ്രസാദ് എന്നിവരാണ് മറ്റ് അഭിനേതാക്കള്‍. സാധാരണ ഒരു ചിത്രത്തിന്റെ നിര്‍മ്മാണം എന്ന ടൈറ്റല്‍ വരുമ്പോള്‍ രണ്ട് അല്ലേല്‍ മൂന്ന് പേരുടെ പേരുകള്‍ കാണാറുണ്ട്. എന്നാല്‍ നിഴല്‍ എന്ന ചിത്രത്തിന് അഞ്ച് പേരുകള്‍. മലയാള സിനിമയില്‍ ഒരുപക്ഷേ ആദ്യമായിട്ടാവും ടൈറ്റിലില്‍ തന്നെ 5 പേരുകള്‍. ആന്റോ ജോസഫ് ഫിലിം കമ്പനി, മെലാഞ്ച് ഫിലിം ഹൗസ്, ടെന്റ്‌പോള്‍ മൂവീസ് എന്നിവയുടെ ബാനറുകളില്‍ ആന്റോ ജോസഫ്, പ്രോജക്ട് ഡിസൈനര്‍ ബാദുഷ എന്‍.എം, അഭിജിത്ത് എം പിള്ള, സംവിധായകന്‍ ഫെല്ലിനി ടി.പി, ജിനേഷ് ജോസ് എന്നിവരാണ് ചിത്രം നിര്‍മ്മിക്കുന്നത്. കുഞ്ഞുണ്ണി സി.ഐ, ജിനു വി നാഥ് എന്നിവരാണ് എക്‌സിക്യൂട്ടിവ് പ്രൊഡ്യൂസേഴ്‌സ്.
- അന്താരാഷ്‌ട്ര മോഡല്‍, നിഴലിലെ ക്യൂട്ട് ബോയ്
ദുബായിലെ അന്താരാഷ്‌ട്ര മോഡലും മലയാളിയുമായ ഐസിന്‍ ഹാഷ്, നയന്‍താര -കുഞ്ചാക്കോ ബോബന്‍ കൂട്ടുകെട്ടിലെ ‘നിഴല്‍’ എന്ന സിനിമയില്‍ ഒരു പ്രധാന വേഷത്തില്‍ അഭിനയിക്കുന്നുണ്ട്. അറുപതിലേറെ ഇംഗ്ലീഷ്, അറബിക് പരസ്യങ്ങളില്‍ അഭിനയിക്കുകയും മോഡലാകുകയും ചെയ്ത ഐസിന്‍ ഹാഷ് ആദ്യമായി അഭിനയിക്കുന്ന സിനിമയാണ് നിഴല്‍. കിന്‍ഡര്‍ ജോയ്, ഫോക്‌സ് വാഗണ്‍, നിഡോ, വാര്‍ണര്‍ ബ്രോസ്, ലൈഫ്‌ബോയ്, ഹുവായ് തുടങ്ങിയ അന്താരാഷ്‌ട്ര ബ്രാന്‍ഡുകളുടെ പരസ്യങ്ങളില്‍ അഭിനയിച്ച ഐസിന്‍, അറബിക് പരസ്യങ്ങളിലെ ‘എമിറാത്തി ബോയ്’ എന്ന പേരിലും പ്രശസ്തനാണ്. ദുബായ്, അബുദാബി, ഗവണ്മെന്റുകളുടെ ടൂറിസമടക്കമുള്ള വിഭാഗങ്ങളുടെ നിരവധി പരസ്യ ക്യാമ്പയിനുകളിലും ഐസിന്‍ സ്ഥിരസാന്നിധ്യമാണ്. ഇംഗ്ലണ്ട് ഫുട്ബാള്‍ ടീമിന്റെയും ലിവര്‍പൂളിന്റെയും നായകനായിരുന്ന ഫുട്ബാള്‍ ഇതിഹാസം സ്റ്റീവന്‍ ജെറാര്‍ഡിനെ ആറാമത്തെ വയസ്സില്‍ ഇന്റര്‍വ്യൂ ചെയ്ത് ഐസിന്‍ ശ്രദ്ധനേടിയിട്ടുണ്ട്.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: