പാനൂര്‍: കേരളത്തില്‍ കൊവിഡ് കൈവിട്ടു പോയത് ആരോഗ്യ മന്ത്രി കെ.കെ ശൈലജയുടെ പിടിപ്പുകേടാണെന്ന് ബി.ജെ.പി സംസ്ഥാന പ്രസിഡന്റ് കെ.സുരേന്ദ്രന്‍. അശാസ്ത്രീയമായ രീതിയിലുള്ള പ്രതിരോധ പ്രവര്‍ത്തനമാണ് കൊവിഡ് രോഗികളുടെ എണ്ണത്തില്‍ കേരളത്തെ നമ്പര്‍ വണ്ണാക്കി മാറ്റിയത്.
നാഴികയ്‌ക്ക് നാല്‍പ്പത് വട്ടം കേന്ദ്രത്തെ കുറ്റം പറയുന്ന സംസ്ഥാനത്തിന് കൊവിഡ് പ്രതിരോധത്തിന് വേണ്ട ധനസഹായം നല്‍കിയിട്ടും അത് ഉപയോഗിക്കാനായില്ലെന്നും വിജയയാത്രയ്‌ക്ക് പാനൂരില്‍ നല്‍കിയ സ്വീകരണത്തില്‍ സംസാരിക്കുകയായിരുന്നു അദ്ദേഹം. ക്യൂബയില്‍ നിന്നും കൊവിഡ് വാക്‌സിന്‍ കൊണ്ടുവരുമെന്ന് പറഞ്ഞതുപോലെ നിരവധി തള്ളുകളാണ് കെ.കെ ശൈലജയും പിണറായി വിജയനും നടത്തിയത്. എന്നാല്‍ ഇരുവരും സമ്പൂര്‍ണ്ണ പരാജയമായി മാറി.
മറ്റ് സംസ്ഥാനങ്ങള്‍ ആയുര്‍വേദത്തെയും ഹോമിയോപതിയേയും ആശ്രയിച്ചപ്പോള്‍ സംസ്ഥാനം ഇതിനെ അവഗണിക്കുകയായിരുന്നു. എന്തുകൊണ്ടാണ് കൊവിഡിനെ പ്രതിരോധിക്കാന്‍ സാധിക്കാത്തതെന്ന് കെ.കെ ശൈലജ ആത്മപരിശോധന നടത്തണമെന്നും സുരേന്ദ്രന്‍ പറഞ്ഞു.
പ്രതികരിക്കാൻ ഇവിടെ എഴുതുക: