തിരുവാറ്റ: കോട്ടയം മെഡിക്കല്‍ കോളേജ് ബൈപാസിലെ തിരുവാറ്റ ശ്രീരാമ ഹനുമാന്‍ സ്വാമി ക്ഷേത്രത്തില്‍ മോഷണം. കാണിക്കവഞ്ചി തകര്‍ത്ത മോഷ്ടാവ് പണം കവര്‍ന്നു. ശനിയാഴ്ച രാാത്രിയിലാണ് മോഷണം നടന്നത്. ക്ഷേത്രഭരണസമിതി പ്രസിഡന്റ് രജി കപ്പടയിലില്‍ പ്രഭാത ക്ഷേത്രദര്‍ശനത്തിനെത്തിയപ്പോഴാണ് മോഷണം ശ്രദ്ധയില്‍ പെട്ടത്.
ഹനുമാന്‍ കോവിലിന്റെ മുന്‍വശത്തിരുന്ന കാണിക്കവഞ്ചി എടുത്ത് മാറ്റി പൂട്ടു തകര്‍ത്താണ് പണം കവര്‍ന്നത്. കോട്ടയം മെഡിക്കല്‍ കോളേജിലെത്തുന്ന പാവപ്പെട്ട രോഗികള്‍ക്ക് ആവശ്യമായ സഹായം നല്‍കുന്നതിനാണ് ഈ കാണിക്കവഞ്ചിയിലെ പണം ചെലവഴിക്കുന്നത്. കഴിഞ്ഞ മൂന്നു മാസക്കാലമായി ഇതു തുറന്നിരുന്നില്ല. അതുകൊണ്ടു തന്നെ 5000 ത്തിലധികം രൂപയോളം നഷ്ടപ്പെട്ടിട്ടുള്ളതായി കരുതുന്നു.
നാണയങ്ങള്‍ ഒഴിവാക്കി കറന്‍സി നോട്ടു കള്‍ മാത്രമാണ് കവര്‍ന്നത്. സമീപത്തു നിന്ന് പൂട്ടു തകര്‍ക്കാന്‍ ഉപയോഗിച്ച ഇരുന്നു കമ്പികളും തകര്‍ത്ത താഴും ഉപേക്ഷിച്ച നിലയില്‍ കണ്ടെത്തി. തിരുനടയിലെ കാണിക്കവഞ്ചിയുടെ താഴ് തകര്‍ത്തുവെങ്കിലും തുറക്കാന്‍ കഴിഞ്ഞില്ല. കോട്ടയം വെസ്റ്റ് പോലീസ് സ്ഥലത്തെത്തി. വിരലടയാള വിദഗ്ദരും തെളിവുകള്‍ സ്വീകരിക്കുവാന്‍ എത്തിയിരുന്നു.
പ്രതികരിക്കാൻ ഇവിടെ എഴുതുക: